Հայրենական մեծ պատերազմի տարիների պաստառների ցուցահանդես է բացվել երեքշաբթի Հայաստանի ազգային արխիվում։
«Այսօր մենք հազվադեպ ենք դիմում պլակատի ժանրին, սակայն այդ շարժումն անհրաժեշտ է վերսկսել, և մենք կմտածենք հումորի միջոցով կոնկրետ նպատակների հասնելու մշակույթը վերսկսելու ուղղությամբ»,- ասաց Հայաստանի մշակույթի նախարար Հասմիկ Պողոսյանը ցուցահանդեսի բացման ժամանակ։
Հայաստանի Ազգային արխիվի տնօրեն Ամատունի Վիրաբյանի խոսքերով՝ այսօր Հայաստանում պաշտոնապես մեկնարկում են Հայրենական մեծ պատերազմում տարած հաղթանակի 65-ամյակին նվիրված միջոցառումները, և այս ցուցահանդեսն առաջինն է ցանկում։
Երեքշաբթի Երևանում տեղի ունեցավ 1941-1945 թթ. Հայրենական մեծ պատերազմում տարած հաղթանակի 65-րդ տարեդարձին նվիրված միջոցառումները կազմակերպող պետական հանձնաժողովի նիստը, որը վարեց հանձնաժողովի նախագահ, Հայաստանի վարչապետ Տիգրան Սարգսյանը:
Վիրաբյանի խոսքերով՝ ցուցահանդեսում ներկայացված են հայտնի ռուս նկարիչների այնպիսի պաստառներ, ինչպես, օրինակ, «Մայր հայրենիքն է կանչում» և «Մի շատախոսիր», ինչպես նաև առաջին անգամ ներկայացվել են հայ նկարիչների ծաղրանկարները։
«Ցուցահանդեսում ներկայացված են մեծ արժեք ներկայացնող պաստառների բնօրինակներ՝ ստեղծված նկարիչներ Աշոտ Մամաջանյանի, Շավարշ Հովհաննիսյանի, Սերգեյ Առուտչյանի, Սեդրակ Ռաշմաջյանի և այլով կողմից»,- ասաց նա։
Միաժամանակ արխիվի տնօրենը պարզաբանեց, որ Հայրենական մեծ պատերազմի տարիներին ամեն շաբաթ մեկական պաստառ էր տեղադրվում «Արմտագի պատուհանին» (Հայկական հեռագրային գործակալություն – Նովոստի-Արմենիա)։
«Պատերազմի ճակատներում տեղի ունեցող իրադարձությունների պատկերմամբ ծաղրանկարները ոգեշնչում էին թիկունքում աշխատող բնակչությանը՝ ճակատի համար պատվերներ իրականացնելու համար»,- պարզաբանեց նա՝ հավելելով, որ այդ ծաղրանկարներն իրենց լուման ունեն հաղթանակի հասնելու գործում։
Ասելով, որ ցուցահանդեսին ներկայացվել է 42 պաստառ արխիվում եղած 130 նմանատիպ աշխատանքներից, Վիրաբյանը հայտնեց, որ ցուցահանդեսը կգործի մինչև ապրիլի կեսը։
«Դրանից հետո պաստառները կցուցադրվեն Ռազմական փառքի թանգարանում մինչև մայիսի վերջ»,- ասաց նա։
Ցուցահանդեսում ներկայացված են Ազգային արխիվում, ինչպես նաև Հայաստանի Պատմության թանգարանում պահվող աշխատանքները։ -0-
