ԵՐԵՎԱՆ, 26 մարտի. /Նովոստի-Արմենիա/. Հայաստանը պատրաստ չէ միակողմանի զիջումների ղարաբաղյան հարցում, հայտարարել է ՀՀ նախագահ Սերժ Սարգսյանը՝ Սիրիա կատարած պաշտոնական այցի շրջանակներում ելույթ ունենալով հալեպահայ համայնքի ներկայացուցիչների առջև:
«Մենք պատրաստ չենք միակողմանի զիջումների ղարաբաղյան հարցում: Այո, մենք ասում ենք, որ այդ խնդիրը բարդ է, ունի խորը արմատներ, որ այն կարող է երկարատև ժամանակ պահանջել իր լուծման համար, սակայն այն կարող է լուծվել միայն փոխզիջումների հիման վրա և, իհարկե, խաղաղ ճանապարհով», - հայտարարել է նախագահը, հաղորդում է Հայաստանի հանրային հեռուստաընկերությունը:
Նախագահի խոսքերով՝ ամեն ինչ կախված է ադրբեջանական կողմի առաջարկներից:
«Տեսնենք, թե ինչ կառաջարկի ադրբեջանական կողմը: Երբ նման առաջարկներ լինեն, երբ մեզ առաջարկեն լուծման ուղիներ, ապա մենք դրանք երբեք գաղտնի չենք պահի և անպայման կհրապարակենք այնպես, ինչպես հայ-թուրքական հարաբերությունների դեպքում էր», - ասել է Սարսգյանը:
Նա նշել է, որ եթե հայկական հասարակությունն այդ առաջարկները ընդունելի համարի, ապա դրանք կընդունվեն, հակառակ դեպքում՝ կմերժվեն:
«Գաղտնի համաձայնությունների և լուծման ուղիների մասին մնացած բոլոր խոսակցությունները, իբրև թե ինչ-որ բան տվել են, իսկ մի բան ստացել, հեքիաթներ են և կրկնվում են երկար ժամանակվա ընթացքում: Մենք չենք կարող առուծախի մեջ մտնել ղարաբաղյան հարցում, քանի որ Ղարաբաղը մեզ բոլորիս համար անգին է», - ասել է ՀՀ նախագահը:
Ղարաբաղյան հակամարտությունը սկիզբ է առել 1988 թ.-ին, երբ հիմնականում հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին։
1991 թ. դեկտեմբերի 10-ին, Խորհրդային Միության փլուզումից մի քանի օր առաջ, Լեռնային Ղարաբաղում տեղի ունեցավ հանրաքվե, որի ժամանակ բնակչության ճնշող մեծամասնությունը՝ 99,89 տոկոսը Ադրբեջանից ամբողջովին անկախանալու կողմ քվեարկեց։
Դրանից հետո սկսվեցին լայնամասշտաբ ռազմական գործողություններ, որոնց հետևանքով Ադրբեջանը կորցրեց վերահսկողությունը Լեռնային Ղարաբաղի և նրան հարակից յոթ շրջանների նկատմամբ։
1994 թ.-ի մայիսի 12-ին՝ զինադադարի մասին համաձայնագրի ուժի մեջ մտնելուց հետո հակամարտության գոտում դադարեցին ռազմական գործողությունները։ Պատերազմի հետևանքով երկու կողմից զոհվեց մոտավորապես 25-30 հազ մարդ և մոտ մեկ միլիոնը ստիպված եղավ լքել բնակավայրերը։
Զինադադարի ռեժիմի մասին համաձայնությունը պահպանվում է մինչ այժմ։
1992 թ.-ից մինչ օրս ընթանում են բանակցություններ հակամարտության խաղաղ կարգավորման ուղղությամբ ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան։-0-
