Ենգիբարովը կլոունադայի ժանրը անհասանելի բարձունքի հասցրեց. Երևանյան կրկեսի տնօրեն

Լեոնիդ Ենգիբարովը աշխարհում առաջին արտիստն էր, ով կլոունադայի ժանրը անհասանելի բարձունքի հասցրեց, հինգշաբթի «Նովոստի» միջազգային մամուլի կենտրոնում ասաց Երևանի պետական կրկեսի տնօրեն և գեղարվեստական ղեկավար Սոս Պետրոսյանը:

«Կրկրեսային ներկայացումների ժամանակ ծաղրածուները սովորաբար իրենց ռեպրիզներով լրացնում են համարների միջև դադարները: Լեոնիդ Ենգիբարովը առաջինն էր, ում համարների դադարները լրացնում էին մնացած արտիստները: Նման բան կրկեսում չի եղել և չի լինի»,- ասաց Պետրոսյանը:  

Ընդ որում նա հիշեցրեց Լեոնիդ Ենգիբարովի լեգենդար հանդիպումը ֆրանսիացի հանրահայտ միմոս Մարսել Մարսոյի հետ, որն իր գործընկերոջն ասել է. «Քո մնջախաղը իմից վեր են դասում»: Պետրոսյանը ևս Ենգիբարովի ու Մարսոյի արվեստի  զուգահեռներ անցկացրեց: «Եթե Մարսոյի ոճը դասական էր, ապա Ենգիբարովի արվեստը արտիստական մնջախաղ էր»,- ասաց Պետրոսյանը: 

Իր հերթին Երևանի մնջախաղի պետական թատրոնի գեղարվեստական ղեկավար ու տնօրեն Ժիրայր Դադասյանը նշեց, որ Ենգիբարովի ֆենոմենը նախևառաջ իր արտիստական հանճարի բազմակողմանիության մեջ էր: «Որքան Ենգիբարովը փայլուն էր որպես ծաղրածու, նույնքան նա փայլուն էր որպես միմոս, գրող ու բանաստեղծ: Այսինքն, այլ կերպ ասած, նա իր մեջ ընդհանրացնում էր Արտիստին»,- ասաց Դադասյանը:  

Լեոնիդ Ենգիբարովը 2010 թվականի մարտի 15-ին կդառնար 75 տարեկան։ 1959 թվականին Ենգիբարովն ավարտել է Մոսկվայի կրկեսային արվեստի պետական ուսումնարանը։ Իր համարներում նա լայնորեն օգտագործում էր մնջախաղի, ակրոբատիկայի, էկվիլիբրիստիկայի, աճպարարության հնարքներ։ Միջազգային մրցանակների դափնեկիր է։ Նկարահանվել է ֆիլմերում։ 

1972 թվականին Երևանում լույս է տեսել Լեոնիդ Ենգիբարովի «Առաջին ռաունդ» նովելների գիրքը, 1984-ին՝ «Վերջին ռաունդ» գիրքը, որում ընդգրկվել են առաջին ժողովածուում տեղ չգտած նովելները։ -0-