Եթե Թուրքիան ցեղասպանության հարցը միջազգային դատական ատյաններ հանի, դա կաշխատի Հայաստանի օգտին. թուրքագետ
Թուրքիայի կողմից Հայոց ցեղասպանության հարցի դուրսբերումը միջազգային դատական ատյաններ ավելի մեծ օգուտ կբերի Հայաստանին, քան թուրքական կողմին, «Նովոստի-Արմենիա» գործակալությանը հայտնեց թուրքագետ Արտակ Շաքարյանը։
«Ինչպես գիտենք, հակագովազդը նույնպես գովազդ է։ Այդ իսկ պատճառով որքան Թուրքիան շատ խոսի հայոց ցեղասպանության մասին, այնքան ավելի շատ կնպաստի դրա միջազգային ճանաչմանը։ Բացի այդ, եթե, օրինակ, Թուրքիան դատի տա Շվեդիայի խորհրդարանին, սա մեզ որևէ կերպ չպետք է անհանգստացնի»,- հայտարարեց փորձագետը։
Թուրքիայի ԱԳՆ պաշտոնական ներկայացուցիչ Բուրակ Օզյուգերգինը չորեքշաբթի հայտարարեց, որ Թուրքիան կարող է վիճարկել հայոց ցեղասպանության ճանաչման բանաձևերը միջազգային դատական ատյաններում։
Հայ փորձագետի խոսքերով, պաշտոնական Անկարան նախկինում էլ բազմիցս նման հայտարարություններ է արել, պարզապես հայ-թուրքական բարելավման գործընթացից առաջ այդ հայտարարություններին այդպիսի նշանակություն չէր տրվում։
«Թուրքական ԱԳՆ հայտարարությունը սովորական երևույթ է։ Այդ հայտարարությունը գլխավորապես ուղղված է ներքին լսարանին և նպատակ ունի սեփական ժողովրդին վճռականություն ցույց տալ»,- ասաց Շաքարյանը։
Թուրքագետն ընդգծեց, որ Թուրքիան չունի որևէ իրավաբանական ապացույց, որոնք կարող են նրանց՝ միջազգային դատարաններում հաղթանակի հասնելու հնարավորություն տալ։
«Հայկական կողմը չպետք է պաշտոնապես արձագանքի Թուրքիայի ԱԳՆ հայտարարություններին, որպեսզի չներգրավվի թուրքական սցենարում»,- հավելեց Շաքարյանը։
Հայաստանի և Թուրքիայի՝ մինչև վերջին ժամանակները բավականին լարված հարաբերությունները սկսեցին կարգավորվել, երբ երկու երկրի արտգործնախարարներ Էդվարդ Նալբանդյանն ու Ահմեդ Դավութօղլուն հոկտեմբերի 10-ին Ցյուրիխի համալսարանում ստորագրեցին «Դիվանագիտական հարաբերությունների հաստատման մասին արձանագրությունը» և «Երկկողմ հարաբերությունների զարգացման մասին արձանագրությունը»: Փաստաթղթերը ստորագրումից հետո պետք է հավանության արժանանան երկու երկրների խորհրդարանների կողմից:
Հայաստանի և Թուրքիայի միջև չկան դիվանագիտական հարաբերություններ, իսկ 1993-ից, պաշտոնական Անկարայի նախաձեռնությամբ, փակ է հայ-թուրքական սահմանը։ Հարաբերությունները բարդացան, երբ Անկարան սկսեց սատարել ադրբեջանական դիրքորոշմանը՝ ղարաբաղյան հարցում, և երբ Թուրքիան կտրուկ արձագանքեց Օսմանյան կայսրությունում 1915թ. հայոց ցեղասպանության միջազգային ճանաչման գործընթացին:-0-
