Կիրիլ Պատրիարքը Կազանի Աստվածամոր սրբապատկեր նվիրաբերեց Երևանի ռուսական եկեղեցուն

ԵՐԵՎԱՆ, 17 մարտի. /Նովոստի-Արմենիա/. Մոսկվայի և Համայն Ռուսիո Կիրիլ Պատրիարքը Կազանի Աստվածամոր սրբապատկեր նվիրաբերեց Երևանի ռուսական եկեղեցուն։

Ինչպես հաղորդում է «Նովոստի-Արմենիա» գործակալության թղթակիցը, եկեղեցում Պատրիարքը հանդիպեց Հայաստանի ռուսական համայնքի ներկայացուցիչներին՝ կոչ անելով հայկական հասարակության ակտիվ անդամներ լինել և իրենց ներդրումն ունենալ նրա զարգացման գործում։ Բացի այդ, Ռուս Ուղղափառ Եկեղեցու ղեկավարը եկեղեցու անդամներին որպես ընծա թողեց Անձեռակերտ Փրկչի փոքրիկ սրբապատկերները։

Եկեղեցու այցելության ընթացքում Կիրիլ Պատրիարքը պարգևներ հանձնեց նաև մի շարք գործիչների։ Մասնավորապես, «Հայաստանի էլեկտրացանցեր» ՓԲԸ գլխավոր տնօրեն Եվգենի Գլանդունչիկը պարգևատրվեց Սրբազան Սերաֆիմ Սարովսկու երրորդ աստիճանի շքանշանով՝ ռուսական համայնքի զարգացման գործում ունեցած ներդրումների համար։

Գյումրիում ՌԴ Գլխավոր հյուպատոս Վլադիմիր Խրուլևը պարգևատրվեց «Դանիել Մոսկովսկու» մեդալով, իսկ Գյումրիի քաղաքապետ Վարդան Ղուկասյանը՝ «Սերգիյ Ռադոնեժսկու» մեդալով՝ ռուս-թուրքական պատերազմների ընթացքում ռուսական բանակի 156 զոհված սպաների մարմինների ամփոփման վայրում հիմնած «Պատվո բլուր» հուշահամալիրը վերականգնելու համար։

Այցի ընթացքում ռուսական եկեղեցուն սրբապատկեր նվիրեց նաև Ամենայն Հայոց Գարեգին Բ Կաթողիկոսը։ -0-