ԵՐԵՎԱՆ, 3 մարտի. /Նովոստի-Արմենիա/. Այս մասին չորեքշաբթի լրագրողներին հայտնեց Սարյանի Տուն-թանգարանի տնօրեն, վարպետի թոռնուհի Ռուզան Սարյանը:
«Նկարչի աշխատանքներից հինգը կտրամադրվեն Սարյանի տուն-թանագրանի կողմից, իսկ տասը նկար՝ Հայաստանի ազգային պատկերասրահից»,- հայտնեց նա:
«Հայ և ռուս գեղանկարիչների գլուխգործոցները հայկական հավաքածուներից» ցուցահանդեսի կազմակերպիչներն են Ռուսաստանի Մշակույթի նախարարությունը և ՀՀ դեսպանատունը:
«Ի տարբերություն եվրոպական երկրների՝ Ռուսաստանն ու Հայաստանը միակ երկրներն են, որ ունեն Սարյանի աշխատանքները»,- հայտնեց տուն-թանգարանի տնօրենը՝ նշելով, որ Տրետյակովյան պատկերասրահի խորհուրդը 1910 թ.-ին առաջին անգամ ձեռք է բերել Սարյանի գլուխգործոցները, որոնց թվում են նրա հայտնի «Կանաչ կուժ», «Կժեր և մրգեր» կտավները:
Ականավոր նկարիչ Մարտիրոս Սարյանի 130 ամյա հոբելյանի շրջանակներում Հայաստանում և Ռուսաստանում ծրագրվում է մի շարք միջոցառումներ անցկացնել:
Մասնավորապես, փետրվարի 26-ից Տրետյակովյան պատկերասրահում բացվել է նկարչի 67 աշխատանքներով անհատական ցուցահանդեսը, որը կգործի մինչև մարտի վերջը: Ռուսաստանի մայրաքաղաքում սպասվում է «Սարյանն ու Մոսկվան» գրքի թողարկումը, ինչպես նաև նկարչի հուշատախտակի բացումը Հին Արբատում գտնվող նրա մոսկովյան տան ճակատին:
Մարտիրոս Սարյանը (1880-1972թթ.) 20-րդ դարի հայ գեղանկարչության խոշորագույն վարպետներից է, որը շարունակել է սիմվոլիզմի ավանդույթները։ Նա ծնվել է Նոր Նախիջևան քաղաքում (ներկայումս Դոնի Ռոստովի կազմում)։
1897թ.-ին ընդունվել է Մոսկվայի գեղանկարչության, քանդակագործության և ճարտարապետության ուսումնարան, որն ավարտել է 1904թ.։ Նրա ուսուցիչների թվում այնպիսի հայտնի ռուս նկարիչներ են եղել, ինչպիսիք են Սերովը և Կորովինը։
Մինչև 1917թ. հոկտեմբերյան հեղաշրջումը մեծ մասամբ բնակվել է Թբիլիսիում և Մոսկվայում, 1921թ.-ից հաստատվել է Երևանում։ Մասնակցել է «Երկնագույն վարդ» (1907թ.), ինչպես նաև «Ռուս նկարիչների միության» և «Արվեստի աշխարհի» ցուցահանդեսներին։--0--
