Հայ-թուրքական արձանագրությունների վավերացման խելամիտ ժամկետը ապրիլի 24-ն է. պատգամավոր

Մինչև ապրիլի 24-ը (Օսմանյան կայսրությունում Հայոց ցեղասպանության զոհերի հիշատակի օրը) պետք է որևէ տեղաշարժ նկատվի հայ-թուրքական հարաբերությունների կարգավորման գործընթացում, չորեքշաբթի մամուլի ասուլիսի ժամանակ ասաց Հայաստանի Հանրապետական կուսակցությունից ՀՀ ԱԺ պատգամավոր, ՀՀ ԱԺ մարդու իրավունքների պաշտպանության և հասարակական հարցերի մշտական հանձնաժողովի փոխնախագահ Ռաֆիկ Պետրոսյանը:

«Հակառակ դեպքում, ինչպես բազմաթիվ անգամ հայտարարել է ՀՀ նախագահ Սերժ Սարգսյանը, Հայաստանը ետ կկանչի իր ստորագրությունը», - ասաց պատգամավորը:

Նրա կարծիքով, Թուրքիան գործընթացն ավելի ձգձգելու որևէ պատճառ չունի, քանի որ հարաբերությունների կարգավորումը բխում է Թուրքիայի շահերից:

ԼՂՀ նախկին արտգործնախարար Արման Մելիքյանն իր հերթին ասաց, որ հայ-թուրքական արձանագրությունները հենց սկզբից չէին համապատասխանում Հայաստանի շահերին:

«Այս գործընթացը  հանգեցրեց երկու կողմերի էլ ավելի թշնամական հռետորականության, քան առաջ էր», - նշեց ԼՂՀ նախկին արտգործնախարարը:

Նրա կարծիքով, Թուրքիայի համար չափազանց շահավետ է վավերացնել արձանագրությունները, քանի որ «արձանագրություններում ամրագրված են Թուրքիայի համար շահավետ դրույթներ»:

«Թուրքիան, ձգձգելով գործընթացը, փորձում է ամրապնդել իր դիրքերը», - հայտարարեց Մելիքյանը:

Հայաստանի ու Թուրքիայի արտգործնախարարները հոկտեմբերի 10-ին Ցյուրիխի համալսարանում ստորագրեցին «Դիվանագիտական հարաբերությունների հաստատման մասին արձանագրությունը» և «Երկկողմ հարաբերությունների զարգացման մասին արձանագրությունը»: Փաստաթղթերը ստորագրումից հետո պետք է հավանության արժանանան երկու երկրների խորհրդարանների կողմից, ինչից հետո նախատեսվում է հայ-թուրքական սահմանի բացումը: Այս պահին փաստաթղթերը ինչպես Հայաստանում, այնպես էլ Թուրքիայում ներկայացվել են վավերացման:

Հայաստանի և Թուրքիայի միջև չկան դիվանագիտական հարաբերություններ, իսկ 1993-ից, պաշտոնական Անկարայի նախաձեռնությամբ, փակ է հայ-թուրքական սահմանը։

Երկու երկրի միջև բարդ հարաբերությունները պայմանավորված են մի շարք հանգամանքներով, որոնք կապված են, մասնավորապես, Անկարայի՝ ադրբեջանական դիրքորոշման պաշտպանությամբ ղարաբաղյան հարցում, ինչպես նաև Թուրքիայի սուր արձագանքի հետ 1915 թվականին Օսմանյան կայսրությունում Հայոց ցեղասպանության միջազգային ճանաչման հետ կապված։ -0-