«Հրթիռային ճգնաժամը» կազդի հայ-թուրքական և ղարաբաղյան հակամարտության գործընթացների վրա
ԵՐԵՎԱՆ, 1 մարտի. /Նովոստի-Արմենիա/. Հարավկովկասյան տարածաշրջանի իրադարձություններն ու գործընթացները կապված են աշխարհի մյուս տարածաշրջաններում ընթացող գործընթացների հետ, մասնավորապես Եվրոպայում հակահրթիռային պաշտպանության ամերիկյան համակարգերի տեղակայման և ռուսական վերահսկիչ միջոցների հետ, կարծում է հայ քաղաքագետ, Քաղաքական հետազոտությունների ինստիտուտի տարածաշրջանային հարցերի փորձագետ Սերգեյ Շաքարյանցը:
«Այդ իրավիճակը կարելի որպես «հրթիռային ճգնաժամ» բնութագրել»,- ընդգծեց նա:
Շաքարյանցը նշեց, որ ամերիկյան հրթիռազենիթային «Պետրիոտ» համակարգերը սկսել են տեղակայել Լեհաստանում, արդեն պայմանավորվածություն կա՝ դրանք Ռումինիայում տեղադրելու մասին, բանակցություններ են տարվում Բուլղարիայի և Թուրքիայի հետ, որոնք պետք է արդյունքում դառնան ամերիկյան ՀՀՊ համակարգի երրորդ դիրքային տարածաշրջանը:
«Որքան էլ խոսվի այն մասին, որ այդ համակարգերն ուղղված են ահաբեկիչների դեմ, բոլորին էլ պարզ է, որ դա այդպես չէ: Դա զուտ հակառուսական գործընթաց է»,- նկատեց նա:
Շաքարյանցը նշեց, որ Ռուսաստանը, որպես պատասխան ԱՄՆ-ի այդ քայլերին, իր հրթիռային «Իսկանդեր» համակարգերը տեղադրեց Կալինինգրադում, զինված ուժերի բարձրաստիճան այրերը հայտարարեցին, որ լիովին հնարավոր են ՀՀՊ նորագույն Ս-400 համակարգերի տեղակայումը նաև Ռուսաստանի սահմաններից դուրս, ինչպես նաև նորագույն Տ-90 տանկերի ձեռքբերումը, որոնց հիմնական մասը կտեղակայվի կովկասյան տարածաշրջանում: «Դա ակնարկ է Ռումինիային, Բուլղարիային ու Թուրքիային» ,- նշեց նա:
Քաղաքագետը ուշադրություն հրավիրեց նաև Ռուսաստանի նոր ռազմական հիմնադրույթի վրա, համաձայն որի միջուկային զենք կարելի է կիրառել ոչ միայն Ռուսաստանի, այլև նրա դաշնակիցների նկատմամբ սպառնալիքի առկայության դեպքում:-0-
