Հայաստանում մեկնարկել է Խաղաղության կորպուսի շաբաթը
Երկուշաբթի Հայաստանում մեկնարկել է Խաղաղության կորպուսի շաբաթը, այն կտևի մինչև մարտի 7-ը:
«Հայաստանում Խաղաղության կորպուսի շաբաթվա շրջանակներում մենք որոշեցինք նշել իրենց ակտիվ դրսևորած կամավորների աշխատանքն ու արժանին մատուցել նրանց», - ասաց Խաղաղության կորպուսի հայկական գրասենյակի տնօրեն Լի Լեյսին:
Նրա խոսքերով, Հայաստանում Խաղաղության կորպուսում աշխատում է շուրջ 76 հայ կամավոր, ովքեր ապրում և աշխատում են հանրապետության մարզերում և փոքր քաղաքներում:
Խաղաղության կորպուսի շաբաթը հիշատակում է այն օրը, երբ Միչիգանի համալսարանում Ջոն Ֆ. Քենեդին ներկայացրեց իր գաղափարը մի ծրագրի վերաբերյալ, որի միջոցով հազարավոր ամերիկացիներ կգործուղվեն այլ երկրներ։
Երկուշաբթի Խաղաղության կորպուսի շաբաթվա շրջանակներում ԱՄՆ Արտակարգ և լիազոր դեսպան Մարի Յովանովիչը և Խաղաղության Կորպուսի Հայաստանի գրասենյակի տնօրեն Լի Լեյսին հանձնեցին շնորհակալագրեր բացառիկ հայերի՝ իրենց համայնքներում ցուցաբերած գերազանց կամավորական աշխատանքի և ծառայության համար։
«Խաղաղության կորպուսի շաբաթվա շրջանակներում մենք շնորհակալություն ենք հայտնում ոչ միայն կորպուսի կամավորներին, այլև բոլոր նրանց, ովքեր իրենց ներդրումն են կատարում հանրապետության մարզերի կարիքների հարցերը լուծելու գործում», - ասաց դեսպանը:
Շնորհակալագրեր հանձնվեցին Արփինե Բաղդոյանին՝ կոռուպցիայի դեմ պայքարում դրսևորած ակտիվության համար, Շուշանիկ Էլոյանին՝ անգլերենի դասավանդման, ինչպես նաև Մանկավարժների պրոֆեսիոնալ ասոցիացիայի ձևավորմանն ուղղված աշխատանում ձեռքբերումների համար, Թամարա Սարգսյանին՝ էկոկրթության ոլորտում երեխաների իրազեկության կազմակերպման և խթանման համար, ինչպես նաև Արտուշ Խաչատրյանին՝ երիտասարդության շրջանում վանական համալիրի տարածքի մաքրման աշխատանքները կազմակերպելու և Հայրենական մեծ պատերազմի վետերաններին ու մասնակիցներին օգնություն ցուցաբերելու համար:-0-
