Հայաստանի մի շարք լրագրողական կազմակերպություններ հինգշաբթի հանդես են եկել հայտարարությամբ, որում դատապարտում են լրագրողի վրա կատարված հերթական հարձակումը:
Ինչպես նշվում է Խոսքի ազատության պաշտպանության կոմիտեի, Երևանի մամուլի ակումբի, «Ինտերնյուս» մամուլի աջակցության հասարակական կազմակերպության, Բազմակողմանի տեղեկատվության ինստիտուտի, Գյումրիի լրագրողների «Ասպարեզ» ակումբի, Վանաձորի մամուլի ակումբի, Գորիսի մամուլի ակումբի կողմից «Նովոստի-Արմենիա» գործակալությանը տրամադրած հայտարարության մեջ, 2010թ. փետրվարի 24-ի առավոտյան ՀՀ գլխավոր դատախազության շենքի առջև բռնարարք է կատարվել «Առավոտ» և «Չորրորդ ինքնիշխանություն» թերթերի ֆոտոթղթակից Գագիկ Շամշյանի նկատմամբ։ Լրագրողը վնասվածքներ է ստացել, նրան ցուցաբերվել է բժշկական օգնություն։
Ըստ ականատեսների վկայությունների, Շամշյանը լուսանկարել է գլխավոր դատախազության կոլեգիայի նիստին մասնակցելու եկած իրավապահ մարմինների բարձրաստիճան պաշտոնյաներին, այսինքն զբաղվել է իր մասնագիտական գործունեությամբ:
«Իսկ բռնարարք կատարած անձը, դատելով այն հանգամանքից, որ այնուհետեւ անարգել մտել է գլխավոր դատախազության շենք, կարող է ուղղակի կապ ունենալ իրավապահ մարմինների հետ», - ասվում է հայտարարության մեջ:
Գագիկ Շամշյանը կոլեգիայի նիստից հետո տեղի ունեցած մամուլի ասուլիսի ժամանակ դեպքի մասին հայտնել է գլխավոր դատախազին՝ տեղեկացնելով նաև, որ հասցրել է լուսանկարել իր վրա հարձակված մարդուն:
«Այլ կերպ ասած, հանրությունը կարող է ակնկալել, որ լրագրողի դեմ իրականացված այս հերթական բռնարարքն անհետևանք չի մնա։ Եվ եթե մեղավորն այս անգամ ևս չբացահայտվի և չպատժվի, մենք բոլոր հիմքերը կունենանք ենթադրելու, որ իրավապահ մարմինները պարզապես խուսափում են բացահայտել այսօրինակ հանցագործությունները», - ընդգծվում է հայտարարության մեջ:-0-
