Հայաստանի հետ հարաբերությունները նորմալացնելու հարցում ԱՄՆ կողմից Թուրքիայի վրա ճնշման դադարեցման հավանականությունը հայ թուրքագետը չի բացառում
Չի բացառվում այն իրավիճակը, որի դեպքում ԱՄՆ-ն դադարի ճնշում գործադրել Թուրքիայի վրա Հայաստանի հետ հարաբերությունները նորմալացնելու համար, ասաց ՀՀ ԳԱԱ Արևելագիտության ինստիտուտի տնօրեն Ռուբեն Սաֆրաստյանը:
«Եթե Թուրքիայում իրավիճակը սրվի, և ամերիկացիները հասկանան, որ հայ-թուրքական արձանագրությունները կարող են թեկուզ փոքր-ինչ խորացնել այդ սրումը, ես չեմ բացառում, որ նրանք հրաժարվեն Թուրքիայի վրա ճնշում գործադրելուց, ինչի ականատեսն ենք մենք այսօր»,- երեքշաբթի մամուլի ասուլիսի ժամանակ ասաց Սաֆրաստյանը:
Հայաստանի ու Թուրքիայի արտգործնախարարները հոկտեմբերի 10-ին Ցյուրիխի համալսարանում ստորագրեցին «Դիվանագիտական հարաբերությունների հաստատման մասին արձանագրությունը» և «Երկկողմ հարաբերությունների զարգացման մասին արձանագրությունը»: Փաստաթղթերը ստորագրումից հետո պետք է հավանության արժանանան երկու երկրների խորհրդարանների կողմից:
Ըստ Սաֆրաստյանի՝ ԱՄՆ-ն ուշադիր հետևում է Թուրքիայում տեղի ունեցող վերջին իրադարձություններին և այսօրվա դրությամբ Միացյալ նահանգների լուծումներն ու մոտեցումները հանգում են նրան, որ Թուրքիայում առայժմ արտակարգ գործընթացներ տեղի չեն ունենում:
«ԱՄՆ-ն նորմալ է համարում և ողջունում է իշխանությունների մեկուսացման գործընթացը զինվորականներից: Սակայն այսօր քաղաքական իրավիճակը Թուրքիայում չի հասել վերջնական որոշումների փուլին, և առայժմ դժվար է ասել, թե ինչպիսին կլինեն հետագա զարգացումները»,- պարզաբանեց թուրքագետը: -0-
