Հայաստանը կվավերացնի հայ-թուրքական արձանագրությունները առանց վերապահումների մոտ ժամանակներում, կարծում է ընդդիմադիր ՀԱԿ-ի ներկայացուցիչ Դավիթ Շահնազարյանը։
«Այսօր հայ-թուրքական հարաբերությունները զարգանում են հակամարտության տրամաբանությանը լիովին համապատասխան։ Հայ-թուրքական հարաբերությունները նոր հակամարտություն է, նոր ճակատ, որը բացվել է Հայաստանի կողմից նախաձեռնված ֆուտբոլային դիվանագիտության արդյունքում»,- հինգշաբթի մամուլի ասուլիսի ժամանակ ասաց Շահնազարյանը։
Ըստ նրա, Հայաստանը ներկայում հայտնվել է շատ ծանր վիճակում, քանի որ Թուրքիան մտադիր չէ վավերացնել արձանագրությունները։
Շահնազարյանը նշեց, որ ամեն օր իրականություն է դառնում ՀԱԿ-ը նախազգուշացումներն ու մտավախություններն այն մասին, որ միջազգային հանրությունը կստիպի Հայաստանին առաջինը վավերացնել հայ-թուրքական արձանագրությունները, չնայած հայկական իշխանությունները խոսում են միայն Թուրքիայից հետո վավերացնելու մասին։
Նա վստահ է, որ ՀՀ խորհրդարանը կընդունի նաև նախագահի նոր օրենսդրական նախաձեռնությունը, համաձայն որի երկրի ղեկավարը կկարողանա չեղյալ հայտարարել միջազգային փաստաթղթերի տակ դրված ստորագրությունը անգամ դրանց վավերացումից հետո։
Ընդ որում Շահնազարյանը կարծիք հայտնեց, որ հայ-թուրքական գործընթացի հիմնական նախաձեռնողը Ռուսաստանն է եղել, որին շահավետ է եղել հայ-թուրքական արձանագրությունների ստորագրումը։
Հայաստանի և Թուրքիայի՝ մինչև վերջին ժամանակները բավականին լարված հարաբերությունները սկսեցին կարգավորվել, երբ երկու երկրի արտգործնախարարներ Էդվարդ Նալբանդյանն ու Ահմեդ Դավութօղլուն հոկտեմբերի 10-ին Ցյուրիխի համալսարանում ստորագրեցին «Դիվանագիտական հարաբերությունների հաստատման մասին արձանագրությունը» և «Երկկողմ հարաբերությունների զարգացման մասին արձանագրությունը»: Փաստաթղթերը ստորագրումից հետո պետք է հավանության արժանանան երկու երկրների խորհրդարանների կողմից:
Հայաստանի և Թուրքիայի միջև չկան դիվանագիտական հարաբերություններ, իսկ 1993-ից, պաշտոնական Անկարայի նախաձեռնությամբ, փակ է հայ-թուրքական սահմանը։ Հարաբերությունները բարդացան, երբ Անկարան սկսեց սատարել ադրբեջանական դիրքորոշմանը՝ ղարաբաղյան հարցում, և երբ Թուրքիան կտրուկ արձագանքեց Օսմանյան կայսրությունում 1915թ. հայոց ցեղասպանության միջազգային ճանաչման գործընթացին:-0-
