Հայաստանն ու Ղազախստանը կզարգացնեն երկրների միջև հաստատված բազմամյա և բարի հարաբերությունները, երեքշաբթի մամուլի ասուլիսի ժամանակ ասաց ՀՀ ԱԳ նախարար Էդվարդ Նալբանդյանը:
«Հայաստանին ու Ղազախստանին կապում են բազմամյա և բարի հարաբերությունները, որոնց ակունքներն ընկած են մեր ընդհանուր պատմության և համագործակցության մեջ, որոնք մենք հաջողությամբ զարգացնում ենք քաղաքական, տնտեսական և մշակութային ոլորտներում», - ասաց նախարարը:
Ինչպես նշեց Նալբանդյանը, այս երկու երկրները ՀԱՊԿ-ի անդամներ են և բնական է, որ կրոնական և մշակութային ամենալայն հարցերի նկատմամբ նրանց մոտեցումներն ու դիրքորոշումները համընկնում են կամ մոտ են:
ՀՀ ԱԳ նախարարի խոսքերով, այսօր տեղի ունեցած հանդիպման ընթացքում կողմերը շարունակել են հայ-ղազախական հարաբերությունների հետագա խորացմանն ու հեռանկարներին առնչվող հարցերի, ինչպես նաև մի շարք կրոնական և միջազգային հարցերի քննարկումը:
ՀՀ ԱԳ նախարարի խոսքերով, քննարկվել են նաև միջազգային կազմակերպությունների շրջանակներում համագործակցությանն առնչվող հարցերը:
«Ինչպես դուք գիտեք, Հայաստանն աջակցել է ԵԱՀԿ-ում նախագահության Ղազախստանի թեկնածությունը, որն այս տարվա հունվարին անցավ Ղազախստանին: Այսօր մենք ակտիվորեն փոխգործակցում ենք այդ կազմակերպության շրջանակներում», - նշեց նախարարը:
Նալբանդյանն ասաց, որ այսօրվա հանդիպման շրջանակներում Հայաստանը հերթական անգամ հաստատել է ԵԱՀԿ-ում նախագահության ծրագրի իրագործման գործում Ղազախստանին աջակցելու պատրաստակամությունը, որի հիմքում ընկած են կազմակերպության աշխատանքների արդյունավետության բարձրացմանը, Հարավային Կովկասում կայունությանն ու անվտանգության ամրապնդմանն առնչվող հարցերը:
ՀՀ ԱԳ նախարարը տեղեկացրեց, որ հաշվի առնելով ղարաբաղյան հակամարտության կարգավորման գործում ԵԱՀԿ-ի առաջատար դիրքը՝ նրանց ներկայացվել է բանակցային գործընթացի ընթացքը, ինչպես նաև հակամարտության խաղաղ կարգավորմանն ուղղված Հայաստանի կողմից ձեռնարկվող ջանքերը: Կողմերը քննարկել են նաև հայ-թուրքական հարաբերությունների կարգավորման գործընթացը:
ԵԱՀԿ գործող նախագահ, Ղազախստանի ԱԳ նախարար Կանատ Սաուդաբաևը փետրվարի 14-17-ը պաշտոնական այցով կլինի Հայաստանում, Վրաստանում և Ադրբեջանում: Երկուշաբթի երկօրյա այցով Երևան ժամանած Սաուդաբաևը հանդիպում կունենա ՀՀ նախագահ Սերժ Սարգսյանի, ՀՀ ԱԺ խոսնակ Հովիկ Աբրահամյանի հետ:-0-
