Փորձագետը էական առաջընթաց է նկատում հայկական բանակում միջանձնային հարաբերություններում 90-ական թվականների համեմատ

ԵՐԵՎԱՆ, 11 փետրվարի. /Նովոստի-Արմենիա/. Հայկական բանակում միջանձնային հարաբերությունների հարցում, 90-ականների համեմատ, զգալի առաջընթաց է արձանագրվել, կարծում է պաշտպանության նախարարության հանրային խորհրդի անդամ, զինվորական հոգեբան Դավիթ Ջամալյանը։

«Դա ակնհայտ է։ Արդյոք կարելի՞ է համեմատել 90-ականներին զորամասերում տիրող բարքերը ժամանակակից բարքերի հետ»,- ասաց նա։

Ջամալյանի խոսքերով՝ գլխավոր դերն այս առաջընթացում խաղացին սերժանտական ժամկետային ծառայության համակարգին անցնելը, ինչպես նաև մեծ ուշադրությունը սպայական կազմի, նրա սոցիալական խնդիրների, պրոֆեսիոնալ մակարդակի բարելավման նկատմամբ։

Փորձագետը նշեց, որ ավելի վաղ սերժանտն իր բաժանմունքում զինվորների հասակակիցն էր, և հաճախ միայն ֆորմալ առաջնորդ էր, ու չէր կարող իր կամային հատկանիշներից ելնելով՝ մրցակցել ոչ ֆորմալ առաջնորդների հետ։ Ներկայումս իրավիճակն արմատապես փոխվել է։

Ջամալյանի խոսքերով՝ ժամկետային սերժանտն ավելի հասուն է, ծառայություն անցած, համապատասխան հմտությունների և կամային որակների տիրապետող, ինչը թույլ է տալիս նվազագույնի հասցնել ոչ ֆորմալ առաջնորդների դերը։

Ջամալյանը նշեց նաև առաջնային գծում միջանձնային հարաբերությունները՝ նկատելով, որ դրանք շատ ավելի լավն են, քան զորամասում։

Դրա պատճառը, նրա կարծիքով, մարդկանց՝ վտանգի դեպքում միաբանվելու հոգեբանական հատկությունն է, ինչը հանգեցնում է նրան, որ զինվորներն ավելի ուշադիր են միմյանց նկատմամբ, և, հետևաբար, բախումների թիվը նրանց միջև նվազում է։

Այս կապակցությամբ նա ավելացրեց, որ ըստ իր դիտարկումների՝ զինվորների մեծ մասը նախընտրում է առաջնային գծում մարտական հերթապահությունը:-0-