Սելիմի լեռնանցքը և Սպիտակ-Ջաջուռ ճանապարհը փակ են ձնաբքի պատճառով. տրանսպորտի նախարարություն

Սելիմի լեռնանցը և Սպիտակ-Ջաջուռ ճանապարհը փակ են ձնաբքի պատճառով, «Նովոստի-Արմենիա» գործակալությանը հայտնեցին ՀՀ տրանսպորտի և կապի նախարարության մամուլի ծառայությունից:

Բացի այդ, Արթիկ-Արագած մայրուղին (Շիրակի և Արագածոտնի մարզեր) և Գեղարքունիքի մարզի ճանապարհները դժվարանցանելի են մերկասառույցի պատճառով:

Երկուշաբթի լույս երեքշաբթի գիշերը Հայաստանում ամենուրեք առատ ձյուն է տեղացել: Հայհիդրոմետծառայության տվյալներով՝ Հայաստանում առաջիկա օրերին 10-12 աստիճանով ցրտելու է: 

Ինչպես երեքշաբթի հայտնեց ՀՀ Փրկարար ծառայությունը, երկուշաբթի բազմաթիվ մեքենաներ ձյան կուտակումների պատճառով մնացել են ճանապարհներին:

«Հունվարի 25-ին, ժամը 15.37-ից մինչև 20.50-ն ընկած ժամանակահատվածում ահազանգեր են ստացվել, որ ձնաբքի հետևանքով Շիրակի մարզի` Մայիսյան-Աշոցք, Թորոսգյուղ-Աշոցք, Լանջիկ, Գյումրի-Թալին, Ցողամարգ-Վարդաղբյուր, Գյումրի-Բավրա, Լոռու մարզի` Վանաձոր-Ալավերդի, Վայոց ձորի մարզի` Մարտունի-Եղեգնաձոր, Արագածոտնի մարզի` Թալին-Մաստարա ավտոճանապարհներին առաջացած խցանումներից բազմաթիվ ավտոմեքենաներ են արգելափակվել»,- ասվում է հաղորդագրության մեջ:

Ահազանգերը փոխանցվել են համապատասխան մարզային փրկարարական վարչություններ: Արագածոտնի մարզում խցանված ավտոմեքենաների ուղևորների մի մասը տեղավորվել է գիշերելու Թալին քաղաքի հրշեջ-փրկարար ջոկատում:

Փրկարարների և մարզային Ճանշինների աշխատակիցների համատեղ ուժերով Շիրակի մարզում խցանումներից դուրս է բերվել 59, Արագածոտնի մարզում` 57 ավտոմեքենա:-0-