Հայաստանի և Բուլղարիայի արտգործնախարարությունները զգալի առաջընթաց են արձանագրում երկկողմ համագործակցության զարգացման գործում

Հայաստանի և Բուլղարիայի արտգործնախարարությունները զգալի առաջընթաց են արձանագրում բոլոր ոլորտներում երկու երկրների միջև համագործակցության զարգացման գործում:

Այս մասին հայտարարվել է երկու երկրների արտգործնախարարությունների միջև խորհրդակցությունների ընթացքում, որոնք տեղի են ունեցել նախօրեին Սոֆիայում՝ Հայաստանի արտգործնախարարի տեղակալ Կարինե Ղազինյանի և Բուլղարիայի արտգործնախարարի տեղակալ Մարին Ռայկովի գլխավորությամբ:

Ինչպես «Նովոստի-Արմենիա» գործակալությանը տեղեկացրեցին ՀՀ ԱԳՆ մամուլի ծառայությունից, կողմերը քննարկել են միջազգային և տարածաշրջանային զարգացումներին, Եվրոպական հարևանության քաղաքականության գործողությունների ծրագրի իրականացմանը, միջազգային կազմակերպություններում երկու երկրների գործակցությանը և Սևծովյան տարածաշրջանում երկկողմ և բազմակողմ համագործակցության զարգացմանն առնչվող հարցեր:

Հայկական կողմը կարևորել է Արևելյան գործընկերության հռչակագրում ամրագրված «անվտանգ միջավայրում քաղաքացիների ազատ տեղաշարժի և մուտքի արտոնագրի ռեժիմի ազատականացմանը» վերաբերող դրույթի իրականացումը:

Նշվել է, որ ԵՄ հարևանության քաղաքականության շրջանակում արդեն իսկ հաստատված ԵԽ գործողությունների ծրագրին Հայաստանի ներգրավվածությունը հնարավորություն կընձեռի առավել սերտ համագործակցություն հաստատել ԵՄ հետ, նաև` ինտեգրվել եվրոպական ներքին շուկային:

Անդրադառնալով քաղաքական, առևտրատնտեսական, գիտամշակութային բնագավառներում Հայաստանի և Բուլղարիայի գործակցությանը` կողմերը նշել են, որ զգալի առաջընթաց է գրանցվել հատկապես գիտամշակութային ոլորտում, և արդեն այս տարի հունիսին Բուլղարիայում կմեկնարկի «Հայաստանի մշակույթի տարի» փառատոնը:

Կողմերը մտքեր են փոխանակել նաև երկու երկրներում իրականացվող բարեփոխումների, հարևանների հետ ունեցած հարաբերությունների, արցախյան հիմնախնդրի բանակցային գործընթացի, նաև հայ-թուրքական հարաբերությունների կարգավորման վերաբերյալ:

Նույն օրը Բուլղարիայի արտաքին գործերի նախարարությանն առընթեր դիվանագիտական ինստիտուտում Ղազինյանը հանդես է եկել դասախոսությամբ` «Հայաստանի Հանրապետության արտաքին քաղաքականությունը և տարածաշրջանային համագործակցությունը» թեմայով:

Նախարարի տեղակալը հարցազրույց է տվել նաև բուլղարական «CROSS» լրատվական գործակալությանը: -0-