ՀԿԵ-ն 2009 թ.-ին ուղևորափոխադրումների աճ է գրանցել

«Հարավկովկասյան երկաթուղի» ՓԲԸ-ի Ուղևորափոխադրումների տնօրինության կողմից տրամադրված օպերատիվ տվյալների համաձայն՝ 2009 թ.-ի ընթացքում 2008 թ.-ի համեմատ ուղևորափոխադրումների ծավալների աճ է գրանցվել, հաղորդում է ընկերության մամուլի ծառայությունը:

Այսպես, նախորդ տարվա ընթացքում միջպետական ուղղություններով տեղափոխվել է 36,4 հազար ուղևոր՝ 2008 թ.-ի 27,5 հազարի փոխարեն:

Տեղական ուղղություններով տեղափոխվել է 719,2 հազար ուղևոր՝ 2008 թ.-ի 651,4 հազարի փոխարեն:

Այսպիսով՝ միջպետական ուղղություններով ուղևորափոխադրումների ծավալների աճը 2009 թ.-ին 2008 թ.-ի համեմատ կազմել է 32,4 տոկոս, տեղական ուղղություններով՝ 10,4 տոկոս:

2009 թ.-ի ընթացքում միջպետական ուղղություններով ուղևորաշրջանառությունը կազմել է 13918 հազար ուղևոր/կմ (2008 թ.-ի համեմատ 42,4 տոկոսի աճ), տեղական ուղղություններով՝ 20368 հազար ուղևոր/կմ (2008 թ.-ի համեմատ 30,1 տոկոսի աճ):

Միջպետական ուղղություններով ՀԿԵ-ն իրականացնում է երկու երթուղի՝ Երևան-Թբիլիսի և Երևան-Բաթումի, որը գործում է ամառային ուղևորափոխադրումների ժամանակ:

Տեղական ուղղություններով էլեկտրագնացքներ են ընթանում Վանաձոր-Այրում, Երևան-Արաքս, Երևան-Արմավիր, Երևան-Երասխ, Երևան-Արարատ, Երևան-Գյումրի, Քանաքեռ-Հրազդան, Գյումրի-Պեմզաշեն երթուղիներով:

«Հայկական երկաթուղիների» կոնցեսիոն կառավարումն իրականացնում է «ՀԿԵ» ՓԲԸ-ն՝ «Ռուսական երկաթուղիներ» ԲԲԸ հարյուրտոկոսանոց դուստրը: ՀԿԵ-ն իր բալանսում ընդունել ՀԵ շարժակակազմը 2008թ. հունիսի մեկից՝  «Հայկական երկաթուղիներ» պետական ՓԲԸ-ն 30 տարի ժամկետով փոխանցման, կողմերի փոխադարձ համաձայնությամբ ևս 10 տարի երկարացման իրավունքով 2008թ. փետրվարի 13-ի կոնցեսիոն պայմանագրին համապատասխան։--0—