Երևանում ընդհարվել են Ազգային ժողովի պատգամավորն ու գեներալը. «Հրապարակ»

ՀՀ ԱԺ պատգամավոր Լևոն Սարգյանի և գեներալ Սեյրան Սարոյանի միջև ընդհարում է տեղի ունեցել, գրում է «Հրապարակ» թերթը:

Ըստ թերթի՝ Սարգսյանի և Սարոյանի «մարդկանց» միջև հունվարի 11-ին «Ջիանի» ակումբում տեղի է ունեցել ծեծկռտուք, որն ուղեկցվել է կրակոցներով:

Դեպքի վայր ժամանակ ոստիկանները հայտնաբերել են 9 մմ տրամաչափի փամփուշտի 2 պարկուճ և 1 գնդակ:

Ոստիկանության տարածած տեղեկատվության մեջ ասվում է, որ երեք անձինք վեճի են բռնկվել Գրիգորի Ս.-ի հետ, ծեծի ենթարկել նրան և անկանոն կրակ արձակել հաստատության ներսում:

Նույն օրը ոմն Հայկ Մ., Ռոման Մ. և Սարո Թ. ներկայացել են ոստիկանություն և խոստովանել, որ իրենք են ծեծի ենթարկել Գրիգոր Ս.-ին:

Միաժամանակ «Հայկական ժամանակ» թերթը գրում է, որ տուժած Գրիգոր Ս.-ն «Գլորիա» խաղատան տերն է, ով միջադեպից հետո տեղափոխվել է «Էրեբունի» բժշկական կենտրոն:

Ինչպես գրում է թերթը, ծեծկռտուքը տեղի է ունեցել այն բանից հետո, երբ Սարգսյանի «մարդիկ» վիրավորել են գեներալ Սարոյանի բարեկամներից մեկին:

Այլ տեղեկությունների համաձայն՝ Սարոյանի «մարդիկ» վիճել են ՀՀ ԱԺ մեկ այլ պատգամավոր՝ Սամվել Ալեքսանյանի թիկնապահների հետ, սակայն նա պաշտոնապես հերքել է իր առնչությունը «Ջիանի» ակումբում տեղի ունեցած ծեծկռտուքի հետ:-0-