Հայաստանը զգալի հաջողությունների է հասել կոռուպցիայի դեմ պայքարում. Հայաստանում ԱՄՆ դեսպան

Հայաստանը զգալի հաջողությունների է հասել կոռուպցիայի դեմ պայքարում, ասաց  Հայաստանում ԱՄՆ Արտակարգ և Լիազոր դեսպան  Մարի Յովանովիչը՝ չորեքշաբթի հանդես գալով Կոռուպցիայի միջազգային օրվան նվիրված ֆորումի բացմանը։

«Ընթացիկ տարում կտրուկ ավելացել են այն դեպքերը, երբ մարդիկ կյանքի են կոչում իրենց իրավունքները և պահանջում են պատասխանատվության ենթարկել պաշտոնատար անձանց՝ դրանով իսկ զգալի ներդրում ունենալով կոռուպցիայի դեմ պայքարի գործում»,- ասաց նա։

Դեսպանն ընդգծեց Հայաստանում 2008 թվականից USAID կոռուպցիոն գործողությունների մոբիլիզացման ծրագրի շրջանակներում գործող Աջակցության և շահերի պաշտպանության կենտրոնների գործունեության արդյունավետությունը։ 

Նրա խոսքերով, նախորդ տարի ավելի քան 200 անձ դիմել է Հայաստանի բոլոր մարզերում գործող նմանատիպ կենտրոններ, և դրանք բավական զգալի դրական արդյունքների են հասել՝ աշխատելով դատախազությունների և դատարանների հետ։

Աջակցության և շահերի պաշտպանության կենտրոնները հասարակական կազմակերպությունների կողմից կառավարվող գրասենյակներ են, ուր քաղաքացիները կարող են հակակոռուպցիոն բողոքներ ներկայացնել և ստանալ անվճար իրավաբանական խորհրդատվություն և աջակցություն։

Յովանովիչը նշեց նաև, որ ցանկացած պետության համար տնտեսական զարգացման լուրջ խոչընդոտ հանդիսացող կոռուպցիան ընդգրկում է գրեթե բոլոր պետությունները, և այս առումով ԱՄՆ-ն բացառություն չէ։ -0-