ՀՀ կրթության և գիտության նախարարությունը մտադիր է 2010 թվականին շարունակել սփյուռքի հայկական դպրոցները դասագրքերով և գույքով ապահովելու գործընթացը:
Ինչպես հաղորդվում է ՀՀ կրթության և գիտության պաշտոնական կայքում, դպրոցական գույքի տրամադրման պետական ծրագրերի շրջանակում ՀՀ կրթության և գիտության նախարարությունը սկսել է Սփյուռքի կրթօջախներից հայտերի ընդունման և հաշվառման գործընթացը
2009 թվականին ՀՀ կրթության և գիտության նախարարությունը աշխարհի շուրջ 40 երկրի 350 կրթօջախի տրամադրել է ավելի քան 70000 կտոր ուսումնական նյութ:
Նշված խմբաքանակում մեծ բաժին են կազմում Վրաստանի հայերեն ուսուցմամբ դպրոցների համար ձեռքբերված նյութերը /32060 կտոր/:
Այս տարի Վրաստան առաքվել են հայոց լեզվի, հայ գրականության դասագրքեր և աշխատանքային տետրեր:
Նյութերը տեղափոխվել են Վրաստանի հայկական դպրոցներ Վրաստանի արտգործնախարարության միջոցով Վրաստանի կրթության և գիտության նախարարության գրավոր համաձայնությունը ստանալուց հետո:
Նույն ժամանակահատվածում իրականացվել է նաև Վրաստանի հայերեն ուսուցմամբ դպրոցներին դպրոցական գույքի առաքումը /1250 սեղան-աթոռ և 270 գրատախտակ/:-0-
