Հայաստանում 2009 թ.-ին գրանցվել է ՃՏՊ-ների թվի աննախադեպ նվազում

Հայաստանում 2009 թ.-ի առաջին 10 ամսվա ընթացքում գրանցվել է ճանապարհատրանսպորտային պատահարների թվի աննախադեպ նվազում, ասաց ՀՀ ճանապարհային ոստիկանության պլանավորման, վերահսկողության և հաշվառման բաժնի պետ Հայկ Սարգսյանը:

«2009 թ.-ի նոյեմբեր 1-ի դրությամբ Հայաստանում գրանցվել է 1622 ՃՏՊ, ինչը 159 դեպքով պակաս է նախորդ տարվա նույն ժամանակահատվածի ցուցանիշից», - ասաց Սարգսյանը ուրբաթ Երևանի Խ. Աբովյանի անվան պետական մանկավարժական համալսարանի ուսանողների հետ հանդիպման ժամանակ:

Նրա խոսքերով՝ վերջին յոթ տարվա ընթացքում Հայաստանում նկատվում էր ՃՏՊ-ների թվի ամենամյա աճ, իսկ 2009 թ.-ին գրանցվել է անկում:

Սարգսյանը տեղեկացրեց, որ Հայաստանում նշված ժամանակահատվածում ՃՏՊ-ների հետևանքով զոհվել է 261 մարդ, այն դեպքում, երբ 2008 թ.-ի նույն ժամանակահատվածում ՃՏՊ-ները 326 մարդու կյանք են խլել:

«Ինչ վերաբերում է տուժածներին, ապա 2009 թ.-ի նշված ամիսների ընթացքում տուժածների թիվը 278-ով նվազել է նախորդ տարվա համեմատ՝ կազմելով 2249 մարդ», - ասել է Ոստիկանության ներկայացուցիչը:

Սարգսյանը նշեց, որ ՃՏՊ-ների թվի կրճատումը պայմանավորված է ճանապարհային երթևեկության նկատմամբ վերահսկողության խստացմամբ և վարորդների կողմից ամրագոտների օգտագործմամբ:

Բացի այդ նա տեղեկացրեց, որ սկսած հոկտեմբերի 1-ից ճանապարհային երթևեկության կանոնների խախտման համար տուգանվել է ավելի քան 2000 հետիոտ:

Հոկտեմբերի 1-ին Ոստիկանությունը խստացրել է օրինախախտ հետիոտների նկատմամբ ձեռնարկվող միջոցառումները, որոնք չսահմանված տեղերով փողոցներն անցնելիս տուգանվում են 3000 դրամով (շուրջ 8 դոլար):-0-