Հինգշաբթի ԱԺ պաշտպանության, ազգային անվտանգության և ներքին գործերի մշտական հանձնաժողովում կայացան «Թիկնազորային գործունեության մասին» ՀՀ օրենքի նախագծի վերաբերյալ ընդլայնված քննարկումներ, որոնք ենթադրում են թիկնապահներին ու պահակներին հատուկ արտոնագրերի հատկացում: Քննարկումներին մասնակցեցին Հայաստանում գործող մասնավոր կազմակերպությունների, Ոստիկանության, ԵԱՀԿ երևանյան գրասենյակի ներկայացուցիչներ:
Ինչպես հայտնեց խորհրդարանական հանձնաժողովի նախագահ Հրայր Կարապետյանը, թիկնազորային գործունեությունը, այնպես ինչպես ցանկացած այլ գործունեություն, օրենսդրական կանոնակարգման կարիք ունի, սակայն Հայաստանում մինչ այժմ չկա համապատասխան օրենք: Կարապետյանի խոսքերով՝ հատուկ օրենքի ընդունման համար շահագրգռված են ինչպես պետությունը, այնպես էլ մասնավոր հատվածը, որոնք երկուսն էլ կշահեն դրա ընդունումից:
«Մինչ այժմ Հայաստանում թիկնազորային գործունեություն իրականացնելիս գոյություն ունեն որոշակի խոչընդոտներ, որոնք պետք է հանվեն օրենքով»,- ասաց Կարապետյանը:
Իր հերթին խորհրդարանական հանձնաժողովի փորձագետ Վահագն Գևորգյանը նշեց, որ մասնավոր պահակների ու թիկնապահների կարիքը ծագեց Հայաստանի անկախության հռչակումից հետո ֆիզիկական ու իրավաբանական անձանց կյանքի, առողջության և գույքի պաշտպանության համար: Գևորգյանը հավելեց, որ չնայած Հայաստանում մասնագիտացված օրենքի բացակայությանը՝ գործում են մի շարք թիկնազորային կազմակերպություններ:
«Օրենքի բացակայությունը թույլ չի տալիս ինչպես հարկն է վերահսկել նրանց գործունեությունը, սահմանել թիկնապահների իրավական կարգավիճակը, նրանց իրավունքներն ու պարտականությունները, կարգավորել այդ ոլորտում հարաբերությունների ողջ շրջանակը: Համապատասխան օրենքի ընդունումը թույլ կտա ազատվել բոլոր չլուծված հարցերից»,- հավաստեց նա:
Ինչպես կարծում է Գևորգյանը, մասնավոր թիկնազորային կազմակերպությունների արտոնագրման կարգի ներմուծումը թույլ կտա վերահսկել թիկնապահների որակավորումը, որոշակի անվտանգության երաշխիքներ կտա, կկասեցնի դատված անձանց ներթափանցումը համակարգ:
Քննարկմանը մասնակցող մասնավոր թիկնազորային կազմակերպությունների ներկայացուցիչները նշեցին թիկնապահ դառնալ ցանկացող անձնանց դատավածության բացակայության մասին տեղեկանքի տրամադրման անհրաժեշտությունը, ինչն առանց հատուկ օերնքի հնարավոր չէ, քանի որ ՀՀ Ոստիկանությունը մասնավոր թիկնազորային կազմակերպություններին իրենց հարցման համաձայն տեղեկանքներ տալու իրավունք չունի:
Թիկնազորային ընկերությունների ներկայացուցիչները նշեցին նաև թիկնապահներին եթե ոչ ռազմական, ապա գոնե տրավմատիկ ու պնևմատիկ զենք հատկացնելու անհրաժեշտությունը:
Ներկայումս Հայաստանում գրանցված է 18 մասնավոր թիկնազորային կազմակերպություն: -0-
