Ազգային անվտանգության խորհրդի քարտուղար Արթուր Բաղդասարյանը բավարարված է ՀԱՊԿ շրջանակներում համագործակցության մակարդակով, հինգշաբթի տեղեկացնում է Հայաստանի ազգային անվտանգության քարտուղարի մամուլի ծառայությունը։
«Բելառուսի անվտանգության խորհրդի պետքարտուղարի տեղակալ Ստանիսլավ Զասի գլխավորած պատվիրակության հետ հանդիպման ընթացքում Արթուր Բաղդասարյանը գոհունակությամբ ընդգծել է, որ համագործակցությունը ՀԱՊԿ շրջանակում ակտիվ զարգանում է, համատեղ ջանքեր են գործադրվում երկկողմ ռազմատեխնիկական համագործակցության ակտիվացման, անվտանգության ոլորտում տեղեկատվության փոխանակման, իրավապահ մարմինների, արտակարգ իրավիճակների նախարարության կադրերի պատրաստման և վերապատրաստման, հատուկ ծառայությունների և իրավապահ մարմինների միջև համագործակցության խորացման ուղղությամբ»,- ասվում է հաղորդագրությունում։
Կողմերը քննարկել են ՀԱՊԿ շրջանակում համագործակցությանը, ինչպեսև Հայաստանի և Բելառուսի անվտանգության խորհուրդների միջև երկկողմ համագործակցությանը վերաբերող հարցեր:
Կողմերը նշել են, որ հայ-բելառուսական համագործակցությունը բավական արդյունավետ զարգանում է անվտանգության խորհուրդների միջև ստորագրված համագործակցության հուշագրի շրջանակում: Երկու երկրների անվտանգության խորհուրդների քարտուղարների պայմանավորվածության համաձայն` ակտիվ զարգանում է փոխգործակցությունը Հայաստանի և Բելառուսի անվտանգության խորհուրդների միջև, ինչպեսև գործնական քայլեր են ձեռնարկվում ռազմաարդյունաբերական ոլորտում համագործակցության խորացման ուղղությամբ:
«Բրեստում սեպտեմբերին Հայաստանի եւ Բելառուսի անվտանգության խորհուրդների միջեւ ձեռք բերված պայմանավորվածության համաձայն` ՀԱՊԿ անվտանգության խորհուրդների քարտուղարների կոմիտեն որոշում էր ընդունել ՀԱՊԿ շրջանակում մշակել արագ արձագանքման հատուկ ստորաբաժանումների տեխնիկական վերազինման միջպետական նպատակային ծրագիր»,- ասվում է հաղորդագրությունում։
Հյուրերը նշեցին, որ հանդիպումները տպավորիչ են եղել նաև պաշտպանության և էկոնոմիկայի նախարարություններում, և որ համագործակցության լայն հնարավորություններ են նախանշվում:
Պատվիրակությունը, որի կազմում են նաեւ ռազմաարդյունաբերական խոշոր ձեռնարկությունների ղեկավարներ, այցելել է Հայաստանի ռազմաարդյունաբերական ձեռնարկություններ` տեղում ծանոթացել նրանց հնարավորություններին և համագործակցության կոնկրետ պայմանավորվածություններ ձեռք բերել: -0-
