«Ռուսական արջուկ» միջազգային մրցույթն առաջին անգամ անցկացվեց Երևանում
ԵՐԵՎԱՆ, 12 նոյեմբերի. /Նովոստի-Արմենիա/. «Ռուսական արջուկ» ռուսաց լեզվի միջազգային մրցույթն առաջին անգամ անցկացվեց Երևանում։
Հայաստանում մրցույթն անցկացնում է «Այբ» կրթական հիմնադրամը «Ռոսսոտրուդնիչեստվո» ներկայացուցչության հետ համատեղ։
«Տվյալ մրցույթի հիմնական նպատակը՝ երեխաների մոտ սովորելու ցանկության զարգացումն է, առարկայի մասսայականացումը։ Մենք ցանկանում ենք առարկան ավելի հետաքրքիր դարձնել»,- «Նովոստի-Արմենիա» գործակալությանը հայտնեց «Այբ» կրթական հիմնադրամի տնօրեն Դավիթ Սահակյանը։
Նրա խոսքերով, «Ռուսական արջուկը» փորձնական ծրագիր է, մրցույթին մասնակցում է երևանյան չորս դպրոցների՝ Մայակովսկու անվան թիվ 7 դպրոցի, Չեխովի անվան թիվ 55 դպրոցի, Շահմուրադյանի անվան թիվ 85 և ՌԴ պաշտպանության նախարարության թիվ 21 դպրոցի 250 աշակերտներ։ Միաժամանակ, «Այբի» տնօրենն ասաց, որ 2010 թվականին մրցույթը կանցկացվի հանրապետության բոլոր շահագրգռված դպրոցներում։
«Առաջադրանքները ներկայացված են խաղային ձևաչափով, որպեսզի երեխան, նույնիսկ չիմանալով պատասխանը, կարողանա այն գուշակել։ Դա արված է նրա համար, որպեսզի չլինեն զրո միավոր ստացած երեխաներ։ Այնուամենայնիվ, առաջադրանքներն աստիճանաբար բարդանում են»,- նշեց Սահակյանը` հավելելով, որ մրցույթի արդյունքները հայտնի կդառնան մեկ ամսից։
««Այբ» հանրակրթական հիմնադրամը նախատեսում է ընդլայնել Հայաստանում միջազգային դպրոցական մրցույթների ցուցակը և անցկացնել նաև բնագիտական առարկաների և լեզուների մրցույթներ»,- ասաց նա։
Իր հերթին «Ռոսսոտրուդնիչեստվո» ներկայացուցչության ղեկավար Վիկտոր Կրիվոպուսկովը նշեց ռուսաց լեզվի և հայ-ռուսական բարեկամության կարևորությունը։
Մասնավորապես նա նշեց, որ ռուսաց լեզուն միշտ նպաստել է աշխարհում հայկական էպոսի և հայ գրականության առաջխաղացմանը։ «Հայաստանը և Ռուսաստանը միշտ եղել և մնում են միմյանց կողքին»,- ասաց Կրիվոպուսկովը։
«Ռուսական արջուկ՝ լեզվաբանություն բոլորի համար» մրցույթը «Կենգուրու՝ մաթեմատիկա բոլորի համար» միջազգային մրցույթի «կրտսեր եղբայրն է»։
«Այբ» հիմնադրամն առաջին անգամ 2009 թվականին պաշտոնապես Հայաստանում անցկացրեց «Կենգուրու» մրցույթը, որին մասնակցեց աշակերտների աննախադեպ թիվ՝ 30 567 հոգի։ Հաղթողները մեկնեցին Ռումինիա՝ ամառային ճամբար։ -0-
