ՀՀ նախագահը կարևոր է համարում Եկեղեցու և պետության հարաբերությունները

ԵՐԵՎԱՆ, 2 նոյեմբերի. /Նովոստի-Արմենիա/. ՀՀ նախագահ Սերժ Սարգսյանը կարևոր է համարում Եկեղեցու և պետության հարաբերությունները:

«Եկեղեցի-պետություն հարաբերությունները հատկապես կարևոր են ներկա պատմական փուլում, և պետք է արվի ամեն ինչ, որ այդ հարաբերությունները մշտապես լինեն ներդաշնակ»,- ասել է ՀՀ նախագահը՝ երկուշաբթի ելույթ ունենալով Սբ. Էջմիածնի առաջնորդարանում Հայ Առաքելական եկեղեցու ներկայացուցչական թեմական ժողովի ժամանակ: 

«Խոստովանենք, որ եկեղեցի-պետություն հարաբերությունների կարգավորումը հեշտ խնդիրներից չէ: Եկեղեցին չպետք է միջամտի պետության գործերին, և պետությունը չպետք է միջամտի եկեղեցու գործերին: Այս պարզ բանաձևը դժվար է կիրառել կյանքում, որովհետև մեր` հայերիս դեպքում գրեթե անհնար է զատորոշել այն սահմանը, թե որտեղ է ավարտվում մեր հոգևոր մշակույթը և որտեղ է սկսվում աշխարհիկ, մասնավորապես, քաղաքական մշակույթը»,- երկուշաբթի նախագահ Սարգսյանի խոսքերը մեջբերեցին հայկական պետության ղեկավարի մամուլի ծառայությունից:

Այս առնչությամբ նախագահը նշել է, որ այսօր «մենք մոտ ենք ոսկե միջինին», և դրա հիմքում նաև Վեհափառ Հայրապետի իմաստուն և սկզբունքային կեցվածքն է:

«Այս ասպարեզում, իհարկե, ժամանակը կանի իր անխուսափելի սրբագրումները, բայց ըստ էության մենք ճիշտ ճանապարհի վրա ենք: Պետական կառույցները պատրաստ են շարունակել և խորացնել այս համագործակցությունը, որ արդեն իսկ տալիս է իր դրական արդյունքները»,- ասել է Սերժ Սարգսյանը:

Երկրի ղեկավարը ուրախալի է համարել փաստը, որ հետևողականորեն վերանորոգվում և վերաօծվում են խոնարհված եկեղեցիներն ու մատուռները, կառուցվում և օծվում են նորերը:

Նախագահի խոսքով` դա հնարավորություն է ընձեռում նոր հունով տանելու թեմական ու համայնքային հոգևոր կյանքը, ինչը մեր ներքին կյանքի և ինքնակազմակերպման կարևոր բաղադրիչն է:

Հանրապետության ղեկավարն ասել է, որ չնայած կատարված մեծածավալ աշխատանքին՝ բազում անելիքներ դեռևս առջևում են:

«Թե՛ առանձին-առանձին, թե՛ գործակցաբար մեր պետությունը և Հայ Առաքելական Սուրբ Եկեղեցին` Մայր Աթոռ Սուրբ Էջմիածնի առաջնորդությամբ և Ամենայն Հայոց Հայրապետի հովվապետությամբ դեռ շատ ու շատ անելիք ունեն, որովհետև կատարելության ձգտումը սահմաններ չի ճանաչում»,- ընդգծել է Սարգսյանը:

Երկրի ղեկավարը հաջողություն է մաղթել ՀԱԵ-ին բոլոր ձեռնարկներում, որոնք ուղղված են հայկական պետության ու հայության հոգևոր կարիքների բավարարմանը: 

Թեմական ներկայացուցչական երրորդ ժողովը՝ նվիրված Ընդհանուր Կանոնադրության մաս կազմող` Թեմական Կանոնադրության ուղենշային փաստաթղթի քննարկմանն ու հաստատմանը, բացվել է շաբաթ օրը Մայր Աթոռ Սուրբ Էջմիածնում՝ բարձր նախագահությամբ Ամենայն Հայոց Գարեգին Բ Կաթողիկոսի։ Ժողովին մասնակցում են Երուսաղեմի և Կոստանդնուպոլսի Հայոց Պատրիարքությունների ներկայացուցիչներ, Հայաստանի և Սփյուռքի հայոց թեմերի առաջնորդներ, վանաբնակ բարձրաստիճան հոգևորականներ, Գերագույն Հոգևոր Խորհրդի անդամներ և թեմական աշխարահական ներկայացուցիչներ:--0--