Հայ-թուրքական հարաբերությունների առնչությամբ արձագանք կարելի է սպասել Իրանից. փորձագետ

ԵՐԵՎԱՆ, 22 հոկտեմբերի. /Նովոստի-Արմենիա/. Հայ-թուրքական հարաբերությունների առնչությամբ արձագանք կարելի է սպասել Իրանից, ասաց «Եվրոպական ինտեգրացիա» կազմակերպության ղեկավար Կարեն Բեքարյանը:

«Իրանի միջուկային ծրագրում արդեն կա առաջընթաց, ինչը կարող է հանգեցնել այն բանին, որ Իրանն իր վրա վերցնի այն քաղաքական դերը, որը պասիվ է եղել միջուկային ծրագրի պատճառով»,- հինգշաբթի նա ասաց լրագրողներին:  

Ընդ որում Բեքարյանը պարզաբանեց, որ Իրանն այդպիսով չի կարող հեռու մնալ տարածաշրջանային գործընթացներից:

Հայաստանի ու Թուրքիայի արտգործնախարարները հոկտեմբերի 10-ին Ցյուրիխի համալսարանում ստորագրեցին «Դիվանագիտական հարաբերությունների հաստատման մասին արձանագրությունը» և «Երկկողմ հարաբերությունների զարգացման մասին արձանագրությունը»: Ստորագրումից հետո երկու ամսվա ընթացքում փաստաթղթերը պետք է ներկայացվեն խորհրդարաններին վավերացման համար:

Հայաստանի և Թուրքիայի միջև չկան դիվանագիտական հարաբերություններ, իսկ 1993-ից, պաշտոնական Անկարայի նախաձեռնությամբ, փակ է հայ-թուրքական սահմանը։ -0-