Դաշնակցությունը հանրահավաք է անցկացնում, թեպետ քաղաքապետարանն արգելել էր այն

Շառլ Ազնավուրի հրապարակում հանրահավաք է անցկացնում ՀՅԴ-ն, չնայած քաղաքապետարանը նախապես արգելել էր դրա անցկացումը:

Ինչպես հաղորդում է «Նովոստի-Արմենիա» գործակալության թղթակիցը, ըստ կազմակերպիչների 6-7 հազար մարդ տեղավորող հրապարակն արդեն ամբողջովին լի է մարդկանցով:

Ցուցարարները հավաքվել են «Ոչ մի զիջում Թուրքիային, «Ոչ թուրքական նախապայմաններին», «Արցախն ինքնորոշված է. հարգել փաստը» պաստառներով:

ՀՅԴ առաջնորդներից բացի, հրապարակում են նաև «Ժառանգություն» կուսակցության առաջնորդ Արմեն Մարտիրոսյանը, Ժողովրդական կուսակցության նախագահ Տիգրան Կարապետյանը, «Նոր ժամանակներ» կուսակցության նախագահ Արամ Կարապետյանը, Ռամկավար-Ազատական կուսակցության առաջնորդ Հարություն Առաքելյանը:

Հայ Հեղափոխական դաշնակցությունը հայկական ամենահին կուսակցություններից է՝ հիմնադրված 1890թ.-ին: Կուսակցությունը Սոցինտերնի անդամ է: ՀՅԴ հայկական ներկայացուցչությունը 7 հազար անդամ ունի: Կուսակցությունը 10 տարածաշրջանային մասնաճյուղ և բաժանմունք ունի, ՀՀ խորհրդարանում ՀՅԴ-ն ներկայացված է խմբակցությամբ՝ թվով 16 պատգամավորական մանդատով: ՀՅԴ արտասահմանյան ներկայացուցչությունները շուրջ 25 հազար անդամ ունեն:

ՀՅԴ-ն Թուրքիայի հետ հարաբերությունները կարգավորելու հարցում ՀՀ իշխանությունների քայլերի հետ համաձայն չլինելու պատճառով, 2009 թ.-ի ապրիլի 27-ին իշխող քաղաքական կոալիցիայից դուրս գալուց հետո, հրաժարվեց երեք նախարարական պաշտոնից: 

Դաշնակցությունը դեմ է հայ-թուրքական ստորագրված արձանագրություններին: Կուսակցությունը սեպտեմբերի 12-ից բողոքի ակցիաներ էր անցկացնում, այդ թվում նաև՝ հացադուլ և ստորագրահավաք, ինչպես նաև նախաձեռնել էր 12 կուսակցության կողմից արձանագրությունները չստորագրելու պահանջով հայտարարության ստորագրումը:

Հայաստանի ու Թուրքիայի արտգործնախարարներ Էդվարդ Նալբանդյանն ու Ահմեդ Դավութօղլուն հոկտեմբերի 10-ին Ցյուրիխի համալսարանում ստորագրեցին «Դիվանագիտական հարաբերությունների հաստատման մասին արձանագրությունը» և «Երկկողմ հարաբերությունների զարգացման մասին արձանագրությունը»: Փաստաթղթերը ստորագրումից հետո պետք է հավանության արժանանան երկու երկրների խորհրդարանների կողմից:

Հայաստանի և Թուրքիայի միջև չկան դիվանագիտական հարաբերություններ, իսկ 1993-ից, պաշտոնական Անկարայի նախաձեռնությամբ, փակ է հայ-թուրքական սահմանը։

Երկու երկրների միջև բարդ հարաբերությունները պայմանավորված են մի շարք հանգամանքներով, որոնք կապված են, մասնավորապես, Անկարայի՝ ադրբեջանական դիրքորոշման պաշտպանությամբ ղարաբաղյան հարցում, ինչպես նաև Թուրքիայի սուր արձագանքի հետ 1915 թվականին Օսմանյան կայսրությունում Հայոց ցեղասպանության միջազգային ճանաչման հետ կապված։ -0-