ԵՐԵՎԱՆ, 13 հոկտեմբերի. /Նովոստի-Արմենիա/. Հայ-թուրքական սահմանը կարող է բացվել 2010 թվականի առաջին կիսամյակում Թուրքիայի կողմից քաղաքական որոշման ընդունման դեպքում, կարծում է թուրքագետ, Երևանի պետական համալսարանի արևելագիտության ֆակուլտետի դեկանի տեղակալ Ռուբեն Մելքոնյանը։
«Եթե թուրքական ղեկավարության կողմից քաղաքական որոշում ընդունվի, ապա հայ-թուրքական սահմանը կարող է բացվել 2010 թվականի առաջին կիսամյակում»,- ասաց Մելքոնյանը երեքշաբթի մամուլի ասուլիսում։
Ըստ նրա` ներկայումս Թուրքիան փորձում է օգտագործել բոլոր հնարավորությունները Մեջլիսում հայ-թուրքական արձանագրությունների վավերացումը երկարաձգելու համար՝ հայկական կողմին ներկայացնելով երկկողմ հարաբերությունների բարելավման գործընթացի շարունակության հետ կապված նախապայմաններ։
«Այդ դեպքում սահմանի բացումը կարող է երկարաձգվել մինչև հաջորդ տարվա ապրիլի 24-ը, երբ միջազգային հանրության ուշադրությունը կենտրոնացված կլինի նրան, թե ինչպես իրեն կդրսևորի Թուրքիան 1915 թվականի Հայոց ցեղասպանությանը օրը»,- ասաց Մելքոնյանը։
Փորձագետը կարծում է, որ սահմանի բացումը կախված է նաև երկկողմ հարաբերությունների բարելավմամբ շահագրգռված գերտերությունների ճնշումից։
«Բնականաբար, ԱՄՆ, Ռուսաստանի և ԵՄ ճնշումը աևրձանագրությունների վավերացման և սահմանների բացման վրա կուժեղացվի, և գործընթացը կախված կլինի նրանից, թե քաղաքական ինչ որոշում կընդունի թուրքական ղեկավարությունն այդ իրավիճակում»,- ընդգծեց թուրքագետը։
Միաժամանակ փորձագետը նշեց, որ ներկայումս թուրքական հասարակությունում բնակչության ավելի քան 52 տոկոսը հանդես է գալիս արձանագրությունների վավերացման և սահմանների բացման դեմ։
«Չնայած, որ արդեն հաջորդ շաբաթ արձանագրությունները կներկայացվեն թուրքական Մեջլիս, դժվար է հավատալ, որ առաջինը դրանք կվավերացնի Թուրքիան, գոնե այն պատճառով, որ Թուրքիայի ԱԳՆ ղեկավարը վերջերս հայտարարեց, որ մինչև ղարաբաղյան հակամարտության լուծումն այդ արձանագրությունները չեն վավերացվի»,- ասաց Մելքոնյանը։
