ԱՄՀ-ն բարձր է գնահատել համագործակցությունը Հայաստանի հետ

ԵՐԵՎԱՆ, 12 հոկտեմբերի. /Նովոստի-Արմենիա/.  Նախագահ Սերժ Սարգսյանի և Արժույթի միջազգային հիմնադրամի գործադիր տնօրենների՝ նախօրեին կայացած հանդիպման ընթացքում կողմերը Հայաստանի կառավարության ու միջազգային ֆինանսական այս կառույցի փոխգործակցությունը գնահատել են գերազանց:

«Հիմնադրամի պաշտոնյաներն ընդգծել են, որ Հայաստանը լավագույնս է դրսևորվել իր պարտավորությունները կատարելիս»,- երկուշաբթի «Նովոստի-Արմենիա» գործակալությանը հայտնեցին պետության ղեկավարի մամուլի ծառայությունից:

Կարևորելով ԱՄՀ ֆինանսական և խորհրդատվական աջակցությունը մեր երկրին` նախագահ Սարգսյանը նշել է, որ անկախությունից ի վեր Հայաստանի տնտեսական հաջողություններում մեծ է նաև հիմնադրամի ներդրումը: Նա հույս է հայտնել, որ ԱՄՀ-ն կշարունակի աջակցությունը, իսկ Հայաստանը պատրաստ է շարունակել բարեփոխումներն ու ընդլայնել համագործակցությունը:

Զրուցակիցները մտքեր են փոխանակել գլոբալ ֆինանսատնտեսական ճգնաժամի հարուցած խնդիրների մասին: Նախագահ Սարգսյանը ներկայացրել է տնտեսության ներկա վիճակը, խոսել ճգնաժամի ազդեցության և հետևանքների հաղթահարման ուղղությամբ գործադրվող ջանքերի մասին:

Նշելով, որ դժվարին, բայց անհրաժեշտ որոշումներ են կայացվել, երկրի ղեկավարն ասել է, որ արվում է հնարավորը` արդյունավետ օգտագործվելու առկա կարողություններն ու ֆինանսական ռեսուրսները:

Կողմերը կարևորել են տնտեսության դիվերսիֆիկացիայի, կառուցվածքային բարեփոխումների, գործարար միջավայրի բարելավման ուղղությամբ շարունակական և հետևողական աշխատանքը:

Հիմնադրամի պաշտոնյաները վստահեցրել են, որ ֆինանսական այս կառույցը պատրաստ է հետայսու ևս հնարավորինս օժանդակել Հայաստանի առջև ծառացած խնդիրների հաղթահարմանը:

Հյուրերի խնդրանքով՝ երկրի ղեկավարը ներկայացրել է նաև հայ-թուրքական երկխոսության վերջին զարգացումները:

Հիմնադրամի գործադիր տնօրենները նշել են, որ ԱՄՀ մշտապես կողմ է եղել բաց սահմաններին: -0-