Պաշտպանության ոլորտում բարեփոխումներն անհրաժեշտ են Հայաստանի Զինված ուժերի հետագա զարգացման համար, ուրբաթ հայտարարեց ՀՀ պաշտպանության նախարար Սեյրան Օհանյանը ՀՀ պաշտպանության նախարարությունում կազմակերպված պաշտպանության ոլորտի բարեփոխումներին նվիրված խորհրդակցության ընթացքում:
«Մենք հետամուտ ենք քաղաքականությանը, որը նախատեսում է բարեփոխումների անհրաժեշտություն, քանի որ Զինված ուժերը հասել են զարգացման այնպիսի մակարդակի, որը պահանջում է համապատասխան բարեփոխումներ՝ Զինված ուժերի հետագա զարգացումն ապահովելու համար», - ասաց Օհանյանը:
Նախարարի խոսքերով՝ բարեփոխումներն իրականացվում են «Զինված ուժերի նոր որակ, պաշտպանական բարեփոխումների հաստատուն ընթացք» նշանաբանի ներքո:
ՀՀ ազգային անվտանգության խորհրդի քարտուղար Արթուր Բաղդասարյանն իր հերթին ավելացրեց, որ Հայաստանի՝ պաշտպանության ոլորտում իրականացվող բարեփոխումները շատ արդյունավետ են, և Ազգային անվտանգության խորհուրդն ակտիվորեն ներգրավված է այդ գործընթացի մեջ:
Որպես օրինակ նա բերել է այն փաստը, որ 15 տոկոսով ավելացել է պայմանագրային զինծառայողների թիվը:
ՀՀ պաշտպանության նախարարությունում կազմակերպված խորհրդակցությանն ամփոփվեցին 2009 թ.-ին պաշտպանության ոլորտում իրականացվող բարեփոխումների արդյունքները, ինչպես նաև 2010 թ.-ի առաջնահերթ խնդիրները:-0-
