Հայաստանի ոստիկանությունում անցկացվող բարեփոխումները դրական արդյունքներ են տալիս. ՀՀ վարչապետ

ԵՐԵՎԱՆ, 8 հոկտեմբերի. /Նովոստի-Արմենիա/. Հայաստանի ոստիկանությունում անցկացվող բարեփոխումները դրական արդյունքներ են տալիս, հինգշաբթի կառավարության նիստի ժամանակ ասել է ՀՀ վարչապետ Տիգրան Սարգսյանը:

Նրա խոսքով, վերջին շրջանում բազմաթիվ հանդիպումներ են անցկացվել միջազգային կազմակերպությունների ներկայացուցիչների հետ, որոնք հետևում են Հայաստանում բարեփոխումներին և կոռուպցիոն խնդիրներին, մասնավորապես, աջակցում են հակակոռուպցիոն միջոցառումների իրականացմանը:    

«Բոլորը նշում են, որ ոստիկանությունում անցկացվող բարեփոխումները դրական արդյունքներ են տալիս: Միևնույն ժամանակ հարցումները, որոնք անցկացվել են քաղաքացիների շրջանում նույնպես ցույց են տալիս, որ հասարակության կողմից դրական տեղաշարժեր են նկատվում»,- ասաց Սարգսյանը:  

Միաժամանակ վարչապետն ընդգծեց, որ հայտնաբերվել է մեկ հանգամանք, որը որոշակի ռիսկեր է պարունակում, մասնավորապես ավտոմեքենա գնելիս ոստիկանությունում գրանցում իրականացնելը:  

«Հարցումներն ու դիտարկումները ցույց են տվել, որ այստեղ կան ռիսկեր և այն անհրաժեշտությունը, որ ոստիկանությունն ինքը ստուգումներ անցկացնի տվյալ բնագավառում, հայտնաբերի, թե ինչ փոփոխություններ է պետք կատարել, որպեսզի ավտոմեքենաների գրանցման ժամանակ մեր քաղաքացիներից դրամաշորթության դեպքեր տեղի չունենան»,- ասաց Սարգսյանը: -0-