ՀՀ նախագահ Սերժ Սարգսյանի համահայկական շրջայցը կարևոր նախադեպ է Հայաստանի և սփյուռքի միջև կարծիք փոխանակելու տեսակետից, կարծում է Հայաստանում և Լեռնային Ղարաբաղում Ամերիկայի հայկական համագումարի (ԱՀՀ) տարածաշրջանային տնօրեն Արփի Վարդանյանը:
«Մենք դրական ենք գնահատում և հայ-թուրքական հարաբերությունների գործընթացը, և նախագահի համահայկական շրջայցը: Շրջայցն արժանի է բարձր գնահատականի, քանի որ շատ կարևոր է լուրջ որոշումներ ընդունել՝ նախապես խորհրդակցելով հայության մյուս կեսի հետ», - չորեքշաբթի մամուլի ասուլիսի ժամանակ ասաց Վարդանյանը:
Նրա խոսքերով, մինչ այժմ գոյություն չի ունեցել խորհրդակցությունների նման մեխանիզմ, և Հայաստանի և սփյուռքի միջև կարծիքների փոխանակումն անարդյունավետ էր:
«Այս տեսակետից նախագահի շրջայցը կարևոր նախադեպ է», - նշեց ԱՀՀ-ի տարածաշրջանային տնօրենը:
Հոկտեմբերի 1-ն ՀՀ նախագահ Սերժ Սարգսյանը սկսեց իր համահայկական շրջայցը՝ հայ-թուրքական հարաբերությունների կարգավորման հարցում հայկական սփյուռքի դիրքորոշումներին և մոտեցումներին ծանոթանալու համար: Շրջայցի ընթացքում ՀՀ նախագահն արդեն այցելել է Փարիզ, Նյու Յորք և Լոս Անջելես: Ծրագրված են նաև այցելություններ Բեյրութ և Դոնի Ռոստով:
Խոսելով որոշ երկրների հայկական համայնքներում կազմակերպված բողոքի ցույցերի մասին՝ Վարդանյանը դա նորմալ համարեց:
«Սփյուռքահայերը ցեղասպանությունը վերապրած մարդկանց իրավահաջորդներն են, այդ պատճառով նրանք այդպես հիվանդագին են արձագանքում հայ-թուրքական հարաբերությունների կարգավորման բոլոր գործընթացներին: Սակայն անհրաժեշտ է մի կողմ թողնել զգացմունքները և սթափ գնահատել իրավիճակը», - ընդգծեց համագումարի տարածաշրջանային տնօրենը:
Միաժամանակ նա ավելացրեց, որ դժվար թե որոշ անհամաձայնությունները Հայաստանի և սփյուռքի պառակտմանը հանգեցնեն:
Հայաստանի և Թուրքիայի միջև բացակայում են դիվանագիտական հարաբերությունները, իսկ 1993 թվականից պաշտոնական Անկարայի նախաձեռնությամբ փակվել է հայ-թուրքական սահմանը:
Թուրքիան առաջ է քաշում մի շարք նախապայմաններ՝ երկկողմ հարաբերությունների հաստատման համար, մասնավորապես, Հայաստանի կողմից Առաջին համաշխարհային պատերազմի տարիներին Օսմանյան կայսրությունում Հայոց ցեղասպանության միջազգային ճանաչման քաղաքականությունից հրաժարվելը, երբ սրի էր քաշվել շուրջ մեկուկես միլիոն հայ, Հայաստանի կողմից Թուրքիայի սահմանների ճանաչումը։
Թուրքիայի և Հայաստանի ներկայացուցիչները երկու տարի շարունակ երկկողմ հարաբերությունների կարգավորմանն ուղղված փակ բանակցություններ են անցկացնում Շվեյցարիայում:
Օգոստոսի 31-ին Թուրքիայի և Հայաստանի արտգործնախարարությունները, ինչպես նաև Շվեյցարիայի արտաքին գործերի դեպարտամենտը հայտարարեցին, որ պայմանավորվածություն է ձեռք բերվել քաղաքական խորհրդակցություններ սկսել բանակցությունների ընթացքում շվեյցարական միջնորդությամբ նախնական ստորագրած երկու արձանագրությունների` «Երկու երկրների միջև դիվանագիտական հարաբերությունների հաստատման մասին արձանագրության» և «Երկկողմ հարաբերությունների զարգացման մասին արձանագրության» շուրջ»: Ներքաղաքական խորհրդակցությունները կավարտվեն վեց շաբաթվա ընթացքում, ինչից հետո երկու արձանագրություն կստորագրվի և կներկայացվի համապատասխան խորհրդարաններին վավերացման համար: -0-
