ԵՐԵՎԱՆ, 2 հոկտեմբերի./Նովոստի-Արմենիա/. Համաշխարհային ռոք-աստղերը «Ռոքն օգնում է Հայաստանին» նախագծի շրջանակներում դարձյալ ֆինանսական օգնություն կցուցաբերեն 1988թ.-ի ավերիչ երկրաշարժից տուժած Գյումրի քաղաքին:
Ուրբաթ Երևանում մամուլի ասուլիսի ժամանակ առաջին անգամ ցուցադրվել է «Smoke on the Water» երգի ռեմիքսի տեսահոլովակը: Ինչպես հայտնեց «Ռոքն օգնում է Հայաստանին» նախագծի նախաձեռնող, «Do something» ավստրալական բարեգործական կազմակերպության տնօրեն Ջոն Դին, «Smoke on the Water»-ի ողջ հասույթը կհատկացվի Գյումրու Օկտետ երաժշտական դպրոցին:
«Ռոքն օգնում է Հայաստանին» նախագիծը հիմնադրվել է 24-ամյա Դիի կողմից 1989 թ.-ին 1988թ.-ի Սպիտակի ավերիչ երկրաշարժից տուժած Հայաստանին օգնելու համար:
Նախագծի շրջանակներում Queen, Pink Fioyd, The Who, Deep Purplе, Black Sabbath, Iron Maiden խմբերի երաժիշտները համատեղ ձայնագրել են Deep Purplе Smoke on the Water երգը, որի վարձույթից ստացած հասույթը որպես օգնություն փոխանցվել է Հայաստանին: Բացի այդ, խմբերից յուրաքանչյուրը Հայաստանին նվիրեց մեկ երգ, իսկ 1990 թ.-ին ձայնագրվեց ալբոմ, որի վաճառքից ստացված հասույթը ևս փոխանցվեց Հայաստանին:
Ինչպես նշեց Դին, երկրաշարժից հետո Հայաստանում արևմտյան երկրներն ուզում էին օգնություն ցուցաբերել տուժածներին, սակայն չգիտեին, թե ինչպես օգնել Խորհրդային միության կազմում գտնվող երկրին:
1988թ.-ի Սպիտակի երկրաշարժից, պաշտոնական տվյալներով, զոհվել է 25 հազար մարդ, 140 հազարը դարձել հաշմանդամ, իսկ կես միլոն մարդ անտուն է մնացել:
Նախագծի նախաձեռնողի խոսքերով, այն ժամանակ Հայաստանին օգնել ցանկացողները կարողացան դա անել ԽՍՀՄ նախագահ Միխայիլ Գորբաչևի մտցրած զիջողությունների շնորհիվ: Հենց այդ ժամանակ էլ, ինչպես նշեց Դին, ծագել է «Smoke on the Water» երգը համատեղ ձայնագրելու և ողջ հասույթը Հայաստանին հատկացնելու գաղափարը:
«Երեկ մենք այցելել ենք Գյումրու երաժշտական դպրոցը: Չեմ կարող խոսքերով նկարագրել այն պայմանները, որոնցում սովորում են երեխաները: Դպրոցը տեղակայված է ժամանակավոր շինության մեջ, ներսում ցուրտ է ու խոնավ, սենյակները հարմարեցված չեն դասեր անցկացնելու համար: Այդ իսկ պատճառով մենք որոշեցինք «Smoke on the Water» ռեմիքսից ստացված ողջ հասույթը հատկացնել դպրոցի վերականգնմանը»,- նշեց նա:
Իր հերթին «Black Sabbath» ռոք խմբի հիմնադիր ու մասնակից Թոնի Այոմին ասաց, որ հնարավոր է՝ Հայաստանում նկարահանվի իր խմբի երգերից մեկի նոր տեսահոլովակը: Այոմին հավելեց, որ, ամենայն հավանականությամբ, դա կլինի «Պարանոյա» երգիը տեսահոլովակը: Երաժիշտը նշեց, որ Հայաստանին օգնելու նպատակով միջոցներ հավաքելու համար տեսահոլովակներ նկարահանելու փորձը բավականին հաջող է ու արդյունավետ:
Համաշխարհային ռոք-աստղեր Յան Գիլանը, Թոնի Այոմին, Ջեֆ Դաունսը, հայտնի թենիսիստ Փեթ Քեշն ու «Ռոքն օգնում է Հայաստանին» նախագծի նախաձեռնող, ավստրալական «Do something» բարեգործական կազմակերպության տնօրեն Ջոն Դին մեկօրյա այցով Հայաստան են ժամանել հոկտեմբերի 1-ին: Այցը հնարավոր է դարձել ՀՀ նախագահի աշխատակազմի, «Հայռուսգազարդ» ընկերության և BMI ավիաընկերության աջակցության շնորհիվ:-0-
