Հայ-թուրքական հարաբերությունների կարգավորման գործընթացը պետք չէ այլ հարցերի լուծման հետ կապել. ԱՄՆ պետքարտուղարի տեղակալ
Հայ-թուրքական հարաբերությունները շատ կարևոր են, և պետք չէ դրանք կապել այլ հարցերի հանգուցալուծման հետ, կարծում է ԱՄՆ պետքարտուղարի՝ Եվրոպայի և Եվրասիայի հարցերով տեղակալ Ֆիլիպ Գորդոնը, տեղեկանում ենք ԱՄՆ Պետդեպարտամենտի պաշտոնական կայքից։
«Հայ-թուրքական հարաբերությունների կարգավորման գործընթացում նախապայմաններ առաջ չքաշելը վերաբերում է երկու կողմերին էլ»,- ասել է նա՝ պատասխանելով առանց նախապայմանների հայ-թուրքական հարաբերությունների կարգավորմանը վերաբերող հարցին։
Հայկական կողմը բազմաթիվ անգամ հայտարարել է Թուրքիայի հետ առանց նախապայմանների հարաբերությունները կարգավորելու մտադրության մասին։
«Հայաստանը մեկուսացված է՝ առանց Թուրքիայի հետ բաց սահման ունենալու։ Տարածաշրջանում չնչին լարվածության դեպքում Հայաստանը շրջափակման մեջ է հայտնվում, և Վրաստանի նախորդ տարվա պատերազմը դրա հաստատումը դարձավ»,- ասաց Գորդոնը։
Հենց այս պատճառով պետքարտուղարը ռազմավարական նշանակություն է տվել Հայաստանի և Թուրքիայի սահմանի բացմանը և նշել, որ Հայաստանի նախագահ Սերժ Սարգսյանի այցը Թուրքիա՝ երկու երկրների հավաքականների ֆուտբոլային հանդիպումը դիտելու միայն դրականապես կազդի հարաբերությունների կարգավորման գործընթացի վրա։
Արձանագրությունների ստորագրման կոնկրետ ժամկետների կապակցությամբ Գորդոնը պարզաբանեց, որ ԱՄՆ-ն այս առիթով որևէ մեկնաբանություններ անել չի կարող, քանի որ «դա բանակցող կողմերի իրավունքն է»։
Հայաստանի և Թուրքիայի միջև բացակայում են դիվանագիտական հարաբերությունները, իսկ 1993 թվականից պաշտոնական Անկարայի նախաձեռնությամբ փակվել է հայ-թուրքական սահմանը:
Թուրքիան առաջ է քաշում մի շարք նախապայմաններ՝ երկկողմ հարաբերությունների հաստատման համար, մասնավորապես, Հայաստանի կողմից Առաջին համաշխարհային պատերազմի տարիներին Օսմանյան կայսրությունում Հայոց ցեղասպանության միջազգային ճանաչման քաղաքականությունից հրաժարվելը, երբ սրի էր քաշվել շուրջ մեկուկես միլիոն հայ, Հայաստանի կողմից Թուրքիայի սահմանների ճանաչումը։
Հարաբերություններում առաջին տեղաշարժերը նկատվեցին 2008 թ.-ի սեպտեմբերի 6-ին, երբ Թուրքիայի նախագահ Աբդուլա Գյուլը ՀՀ նախագահ Սերժ Սարգսյանի հրավերով առաջին անգամ այցելեց Երևան՝ 2010 թ.-ի աշխարհի առաջնության ընտրական փուլի շրջանակներում Հայաստանի և Թուրքիայի հավաքականների միջև ֆուտբոլային հանդիպումը դիտելու նպատակով։ Այցի ընթացքում երկու պետությունների ղեկավարները քննարկեցին երկկողմ հարաբերությունների հաստատման հնարավորությունները։-0-
