ԵՐԵՎԱՆ, 30 սեպտեմբերի. /Նովոստի-Արմենիա/. «ՌԻԱ Նովոստիի» և Ռուս-հայկական (սլավոնական) համալսարանի համատեղ «Անվտանգությունը Հարավային Կովկասում. տարածաշրջանի ժողովուրդների շահերի իրացումը» համաժողովը տեղի կունենա Երևանում հոկտեմբերի 1-4-ը:
Սա թվով չորրորդ ամենամյա միջազգային համաժողովն է, որը կազմակերպում է «ՌԻԱ Նովոստին»՝ Հայաստանի, Ադրբեջանի և Վրաստանի լրագրողական և փորձագիտական հանրության ներկայացուցիչների, ինչպես նաև հայտնի ռուս գիտնականների, տնտեսագետների, քաղաքագետների, առաջատար բուհերի, տպագիր և էլեկտրոնային հրատարակությունների ղեկավարների մասնակությամբ:
Ինչպես չորեքշաբթի «Նովոստի-Արմենիա» գործակալությանը տեղեկացրեցին համաժողովին կազմկոմիտեից, համաժողովը կդառնա «ՌԻԱ Նովոստիի»՝ Հարավային Կովկասի տարածաշրջանի երկրների հետ տեղեկատվական համագործակցության գաղափարների առաջխաղացմանը նվիրված մի շարք միջոցառումների ինքնատիպ շարունակությունը:
Համաժողովի մասնակիցները մտադիր են կովկասյան պետությունների լայն լսարանին ներկայացնել տարածաշրջանում Ռուսաստանի դերի, Կովկասում կայունության ձեռքբերման հարցում նրա շահագրգռվածության մասին առավել ընդարձակ և հավաստի տեղեկատվություն:
Այս նպատակով «Նովոստի» միջազգային մամուլի կենտրոնում տեղի կունենա Երևան-Կիև տեսակամուրջ՝ «Նոր աշխարհաքաղաքական լանդշաֆտ Մեծ Կովկասում» թեմայով:
Համաժողովին կմասնակցեն Ռուսաստանի գիտությունների ակադեմիայի Տնտեսագիտության ինստիտուտի փոխտնօրեն Սվետլանա Գլինկինան, ԱՄՆ Անվտանգության ինստիտուտի ռուսական և ասիական ծրագրերի տնօրեն Նիկոլայ Զլոբինը, «The New Times» ամսագրի գլխավոր խմբագրի տեղակալ Անդրեյ Կոլեսնիկովը, Մոսկվայի միջազգային հարաբերությունների պետական ինստիտուտի Կովկասյան ուսումնասիրությունների կենտրոնի տնօրեն Վլադիմիր Դեգոևը, «International Alert» Եվրասիայի գծով նախագծերի տնօրեն Դեսսի Ռուսանովը, Աշխարհաքաղաքական հետազոտությունների միջազգային կենտրոնի (Թբիլիսի) փորձագետ Գեորգի Վոլսկին:
Միջոցառմանը նաև կմասնակցեն գրող, հրապարակախոս, «Կուլտուրա» հեռուստաալիքով հեռարձակվող ծրագրի հեղինակ և հաղորդավար Ալեքսանդր Արխանգելսկին, Ռազմավարական հետազոտությունների միջազգային ինստիտուտի (Մեծ Բրիտանիա) Ռուսաստանի և Եվրասիայի ծրագրերի տնօրեն Օքսանա Անտոնենկոն, ՌԴ ԱԳՆ-ին առընթեր Մոսկվայի միջազգային հարաբերությունների պետական ինստիտուտի միջազգային լրագրության ֆակուլտետի դեկան Յարոսլավ Սկվորցովը:
Համաժողովի մասնակիցների թվում են նաև «Ջորջիան Թայմս» հոլդինգի նախագահ, «Ազրի» ռազմավարական հետազոտությունների կենտրոնի ղեկավար Մալխաս Գուլաշվիլին, «Սվոբոդնայա Գռուզիա» ռուսալեզու թերթի գլխավոր խմբագիր Անտոն Լասխիշվիլին, «ՌԻԱ Նովոստի» միջազգային լրատվության ռուսական գործակալության ԱՊՀ և Բալթյան երկրների խմբագրության ղեկավար Ալան Կասաևը, «Նեզավիսիմոյե վոյեննոյե օբոզրենիյե» թերթի գլխավոր խմբագրի տեղակալ Վիկտոր Լիտովկինը, «ՍՈՖԻԱ» քաղաքական հետազոտությունների կենտրոնի (Ուկրաինա) ղեկավար Անդրեյ Երմոլաևը, լրագրող, հեռուստահաղորդավար, ՌԴ Հասարակական պալատի ազգամիջյան հարաբերությունների և խղճի ազատության հանձնաժողովի անդամ Մաքսիմ Շևչենկոն:
Այս տարի համաժողովի անցկացումը նվիրված է ՌՀՄ-ի 10-ամյակին: Բուհի զարգացման, նրա կրթական նշանակության ամրապնդման գործում «ՌԻԱ Նովոստիի» ներդրումը կլինեն ապագա լրագրողների և քաղաքագետների համար կազմակերպվելիք վարպետության դասընթացները, որոնք կանցկացնեն հանրաճանաչ ռուսական հրատարակությունների գլխավոր խմբագրերն ու Ռուսաստանի միջազգային քաղաքականության մասնագետները:-0-
