ԵՄ-ն մտադիր է խորացնել քաղաքական երկխոսությունը և համագործակցությունը Հայաստանի հետ
ԵՐԵՎԱՆ, 22 սեպտեմբերի. /Նովոստի-Արմենիա/. ԵՄ-ն մտադիր է խորացնել քաղաքական երկխոսությունը և համագործակցությունը Հայաստանի հետ, հայտնեց Հայաստան-ԵՄ համագործակցության կոմիտեի եվրոպացի համանախագահ Գունար Ուիգենդը։
«Վերջին տարիներին մենք աստիճանաբար խորացրել ենք քաղաքական երկխոսությունը Հայաստանի հետ, ավելացրել ենք օժանդակությունը և մտադիր ենք դա շարունակել նաև հետագայում»,- հավաստիացրեց Ուիգենդը երեքշաբթի Երևանում տեղի ունեցած Հայաստան-ԵՄ համագործակցության կոմիտեի 10-րդ նիստի ընթացքում։
Կառույցի եվրոպացի համանախագահի խոսքերով, չնայած արդեն կատարած աշխատանքի մեծ ծավալներին, կողմերը դեռևս ակտիվ աշխատանք պետք է իրականացնեն։ Ուիգենդը նշեց, որ կոմիտեի նիստը թույլ կտա դիտարկել ինչպես իրականացրած աշխատանքի հաշվետվությունը, այնպես էլ ուրվագծել համագործակցության հետագա ծրագրերը։
Համանախագահը նկատեց, որ համագործակցության համար լրացուցիչ հնարավորություններ և հեռանկներներ է ստեղծում Արևելյան գործընկերության նոր նախաձեռնությունը, որը կողմերը պետք է օգտագործեն հարաբերությունների ակտիվացման համար։
«Արևելյան գործընկերությունը» լեհական-շվեդական նախաձեռնություն է՝ հարևանության քաղաքականության շրջանակներում, որն ուղղված է հետխորհրդային երկրների և ԵՄ-ի միջև հարաբերությունների բարելավմանը։ Ծրագիրը հաստատվել է 2008թ. մարտի 20-ին կայացած Եվրամիության նիստի ժամանակ։«Արևելյան գործընկերությունն» ընդգրկում է Եվրամիության վեց հարևան երկիր՝ Ադրբեջան, Հայաստան, Վրաստան, Մոլդովա, Ուկրաինա և Բելառուս։
Ուիգենդը անդրադարձավ նաև Հայաստանի և ԵՄ-ի միջև ընկերակցական համագործակցության հարցին՝ հայտարարելով, որ նման համագործակցությունը լրացուցիչ հնարավորություններ է ընձեռում, սակայն միաժամանակ կողմերի վրա լրացուցիչ պարտականություններ է դնում։
«Դա նշանակում է, որ կողմերը պատրաստ են մշտական համագործակցության, ոչ թե ժամանակ առ ժամանակ անցկացվող հանդիպումների և քննարկումների։ Սակայն մինչ այդ մենք պետք է մտածենք ներկայիս ձևաչափով համագործակցության արդյունավետության մասին»,- ասաց նա։
Հայաստան-ԵՄ համագործակցության կոմիտեն ստեղծվել է Հայաստանի և Եվրոպական համայնքների միջև 1996 թվականի ապրիլի 22-ին ստորագրված և 1999 թվականի հուլիսի մեկին ուժի մեջ մտած համագործակցության և գործընկերության համաձայնագրին համապատասխան։
Կոմիտեի նիստերն անցկացվում են ռոտացիոն կարգով՝ ըստ հերթականության, Բրյուսելում և Երևանում։ Հայկական կողմից կոմիտեն գլխավորում է Էկոնոմիկայի նախարար Ներսես Երիցյանը, եվրոպական կողմից՝ Եվրահանձնաժողովի արտաքին հարաբերությունների գլխավոր տնօրինության վարչության տնօրեն Գունար Ուիգենդը և Եվրահանձնաժողովի առևտրի գլխավոր տնօրինության վարչության տնօրեն Եվա Սինովիչը։ -0-
