ԵՐԵՎԱՆ, 11 սեպտեմբերի. /Նովոստի-Արմենիա/. Հայ ազգային կոնգրեսը սեպտեմբերի 18-ին հայ-թուրքական հարաբերություններին նվիրված հանրահավաք կանցկացնի Երևանում, ուրբաթ լրագրողներին հայտնեց Հայ ազգային կոնգրեսի (ՀԱԿ) կենտրոնական գրասենյակի համակարգող Լևոն Զուրաբյանը։
Նրա խոսքերով՝ հանրահավաքին կներկայացվեն Կոնգրեսի մոտեցումները հայ-թուրքական սահմանի հնարավոր բացման բանակցությունների ներկա գործընթացի վերաբերյալ, ինչպես նաև կներկյացվեն այն սպառնալիքները, որոնք պարունակում են Շվեյցարիայի միջնորդությամբ մշակված արձանագրությունները։
«Հայ-թուրքական հարաբերությունների կարգավորումը բխում է Հայաստանի շահերից, սակայն Թուրքիան ձևական քայլեր է իրականացնում, որոնք ուղղված չեն հարաբերությունների բարելավմանը և սահմանի բացմանը»,- ասաց Զուրաբյանը։
Ըստ նրա՝ հանրահավաքի ընթացքում կքննարկվեն հայ-թուրքական թեմատիկակին վերաբերող բոլոր հարցերը, ինչպես նաև վտանգավոր գործընթացների կանխման ձևերը։
Օգոստոսի 31-ին Թուրքիայի և Հայաստանի արտգործնախարարությունները, ինչպես նաև Շվեյցարիայի արտաքին գործերի դեպարտամենտը հայտարարեցին, որ պայմանավորվածություն է ձեռք բերվել քաղաքական խորհրդատվություններ սկսել բանակցությունների ընթացքում շվեյցարական միջնորդությամբ նախնական ստորագրած երկու արձանագրությունների` «Երկու երկրների միջև դիվանագիտական հարաբերությունների հաստատման մասին արձանագրության» և «Երկկողմ հարաբերությունների զարգացման մասին արձանագրության» շուրջ»: Ներքաղաքական խորհրդատվությունները կավարտվեն վեց շաբաթվա ընթացքում, ինչից հետո երկու արձանագրություն կստորագրվի և կներկայացվի համապատասխան խորհրդարաններին վավերացման համար:
Ներկայումս Հայաստանի և Թուրքիայի միջև չկան դիվանագիտական հարաբերություններ, իսկ 1993-ից, պաշտոնական Անկարայի նախաձեռնությամբ, փակ է հայ-թուրքական սահմանը։
Երկու եկրների միջև բարդ հարաբերությունները պայմանավորված են մի շարք հանգամանքներով, որոնք կապված են, մասնավորապես, Անկարայի՝ ադրբեջանական դիրքորոշման պաշտպանությամբ ղարաբաղյան հարցում, ինչպես նաև Թուրքիայի սուր արձագանքի հետ 1915 թվականին Օսմանյան կայսրությունում Հայոց ցեղասպանության միջազգային ճանաչման հետ կապված։
Հարաբերություններում առաջին տեղաշարժերը նկատվեցին 2008թ.-ի սեպտեմբերի 6-ին, երբ Թուրքիայի նախագահ Աբդուլա Գյուլը ՀՀ նախագահ Սերժ Սարգսյանի հրավերով առաջին անգամ այցելեց Երևան՝ 2010թ.-ի աշխարհի առաջնության ընտրական փուլի շրջանակներում Հայաստանի և Թուրքիայի հավաքականների միջև ֆուտբոլային հանդիպումը դիտելու նպատակով։ Հանդիպման ավարտից հետո Թուրքիայի նախագահը հրավիրել է իր հայ գործընկերոջ Թուրքիա ներկա գտնվելու 2009 թ.- հոկտեմբերի 14-ին կայանալիք երկու երկրների ֆուտբոլի հավաքականների պատասխան խաղին:-0-
