Սիսիան քաղաքի մանկապարտեզի՝ թունավորման հետևանքով հոսպիտալացված սաների վիճակը կայուն է
![Սիսիան քաղաքի մանկապարտեզի՝ թունավորման հետևանքով հոսպիտալացված սաների վիճակը կայուն է Սիսիան քաղաքի մանկապարտեզի՝ թունավորման հետևանքով հոսպիտալացված սաների վիճակը կայուն է](/upload/iblock/03c/xwzrxc74rm75650owxpr8bakuaykw5gu.jpg)
ԵՐԵՎԱՆ, 11 սեպտեմբերի. /Նովոստի-Արմենիա/. Սիսիան քաղաքի մանկապարտեզի՝ թունավորման հետևանքով հոսպիտալացված սաների վիճակը կայուն է, ուրբաթ լրագրողներին հայտնեց հանրապետության գլխավոր վարակաբան Արա Ասոյանը:
«Օպերատիվ կերպով ձեռնարկված միջոցառումներն ու Սիսիանի հիվանդանոցի բուժանձնակազմի պրոֆեսիոնալիզմը թույլ տվեցին խուսափել թունավորման ծանր ու ծայրահեղ ծանր հետևանքներից»,- նշեց Ասոյանը:
Նա հայտնեց, որ անալիզների արդյունքում բոլոր երեխաների մոտ հայտնաբերվել է դիզենտերիա:
Նրա խոսքերով՝ 24 հոսպիտալացված երեխաներից 4-ի վիճակը գնահատվել է որպես ծայրահեղ ծանր, իսկ մնացածինը՝ որպես ծանր ու միջին ծանրության:
«Սակայն ներկայումս մենք ուրախ ենք փաստել, որ բոլոր երեխաների վիճակը դեպի լավն է գնում, և վարակի առկայության երկրորդ բացասական անալիզից հետո բոլոր երեխաները հիվանդանոցից դուրս կգրվեն»,- հայտնեց նա:
«Անցկացված տնային շրջայցերի արդյունքում, հոսպիտալացված 24 երեխաներից բացի, բացահայտվել են միևնույն մանկապարտեզի ևս 12 սաներ՝ միևնույն ախտանիշներով, որոնց վիճակը թույլ է տվել բուժումն անցկացնել տնային պայմաններում»,- հայտնեց Ասոյանը:
ՀՀ առողջապահության նախարարության Հիգիենիկ և հակահամաճարակային տեսչության պետ Արտավազդ Վանյանի խոսքերով՝ պրոֆիլակտիկայի և հիվանդների վաղ հայտնաբերման նպատակով կատարվել են տնային շրջայցեր, կատարվել է վարակի օջախի ախտահանում, մանկաբարտեզի բոլոր աշխատակիցներն անցել են մանրէաբանական հետազտություն, կատարվել է մանկապարտեզում եղած սննդի լաբորատոր հետազոտություն:
«Սանիտարա-համաճարակաբանական ստուգման արդյունքում պարզվել է, որ մանկապարտեզի սաների՝ սննդից զանգվածային թունավորման պատճառը մանկապարտեզում սննդի պահման, մշակման ու պատրաստման պայմանների կոպիտ խախտումն է եղել»,- ասաց Վանյանը:
Նրա խոսքերով՝ խախտումներ են հայտնաբերվել նաև խանութում պարենամթերքի պահպանման պայմաններում, որտեղից մանկապարտեզը սննդամերթ է գնել:
Ինչպես հայտնեց Վանյանը, հակահամաճարակային տեսչությունն ստուգել է վարակի տարածման բոլոր հնարավոր աղբյուրները, ստուգվել են մանկապարտեզի ու խանութի բոլոր 15 աշխատակիցները, սակայն ստուգման արդյունքները բացասական են եղել:
Վանյանը բացառեց նաև այն հնարավորությունը, որ վարակի տարածման աղբյուրը ջուրն է:
Ներկայումս, Վանյանի խոսքերով, մանկապարտեզի գործունեությունը դադարեցված է մինչև թույլ տված թերությունների լիարժեք վերացումը: -0-