Հայ ոստիկանները պարգևատրվել են «02» հեռուստահաղորդման հոբելյանական թողարկման կապակցությամբ

ԵՐԵՎԱՆ, 11 սեպտեմբերի. /Նովոստի-Արմենիա/. ՀՀ Ոստիկանության հասարակայանության հետ կապերի ու տեղեկատվության վարչության մի շարք աշխատակիցներ, վարչության պետ Սայաթ Շիրինյանի գլխավորությամբ, ուրբաթ պարգևատրվել են պատվոգրերով ու մեդալներով՝ «02» հեռուստահաղորդման 1000-րդ հոբելյանական թողարկման կապակցությամբ:

Ինչպես պարգևատրման արարողության ժամանակ ասաց ՀՀ Ոստիկանության պետ Ալիկ Սարգսյանը, «02» ծրագրի ստեղծմանը մասնակցում են բարձր պրոֆեսիոնալ ու անհատական որակներ ունեցող մարդիկ:

«Գոյության 20 տարվա ընթացքում «02» հաղորդման լրագրողները դարձել են իսկական ոստիկաններ, օրենքի պահապաններ»,- ասաց Սարգսյանը:

Նրա խոսքերով՝ հեռուստահաղորդումը ժողովրդի գիտակցության մեջ օրենքի գերակայությունն ու Ոստիկանության հեղինակությունն ամրապնդելու բարդ առաքելություն ունի:

Ոստիկանության պետը հայտնեց նաև, որ շուտով հաղորդման ձևաչափը նորացվելու է:

«Մենք կփորձենք ազատվել կարծրատիպերից, գտնել հաղորդման նոր մոտեցում: Այն պետք է ոչ միայն լուսաբանի Ոստիկանության աշխատանքը, այլև իրադարձությունների խոր վերլուծություն տրամադրի»,- ասաց Սարգսյանը:    

Իր հերթին Շիրինյանը նշեց, որ «02»-ը հայկական հեռուստատեսության ամենաբարձր վարկանիշ ունեցող հաղորդումներից է:

«Սա պարտավորեցնում է մեզ կատարելագործել հաղորդումը»,- ասաց վարչության պետը:

Հոբելյանի կապակցությամբ հուշամեդալներով պարգևատրվեցին նաև Ոստիկանության վետերանները, որոնք ներդրում են ունեցել հաղորդման ստեղծման գործում, ծրագրի գործընկերներն ու ընկերները: -0-