ՀՀ պաշտպանության նախարարության թիկունքի ծառայությունը ոչ մի կապ չունի Երևանի մարտի 1-ի դեպքերի հետ, ասաց զանգվածային անկարգությունների հետաքննության ժամանակավոր խորհրդարանական հանձնաժողովի անդամ, ՀՀ Միավորված աշխատանքային կուսակցության ներկայացուցիչ Գուրգեն Արսենյանը:
Արսենյանը գլխավորել է կազմալուծված փաստահավաք խմբի նախկին անդամներ Անդրանիկ Քոչարյանի ու Սեդա Սաֆարյանի մեղադրանքների ստուգման խորհրդարանական հանձնաժողովի աշխատանքային խումբը: Ըստ Քոչարյանի ու Սաֆարյանի՝ իբր թե մարտի մեկի դեպքերի նախօրեին երկրի պաշտպանության նախարարության պահեստներից մեկից պաշտոնատար անձանց թիկնապահներին 950 ռազմական համազգեստ է բաժանվել:
Պահեստի ուսումնասիրության արդյունքում, որտեղ փաստահավաք խմբի նախկին անդամների հավաստմամբ, իբր թե, տրվել էին համազգեստները, խորհրդարանական հանձնաժողովի աշխատանքային խմբի անդամները նման մեղադրանքի հաստատում չեն գտել: Ինչպես տեղեկացրել է Արսենյանը, խմբի անդամները ստուգել են մատյանները, պարզվել է, որ այդ օրերին նման իրային շարժք չի եղել: Մարտի 1-ին ապրանքների շարժք տեղի չի ունեցել, քանի որ այդ օրը պահեստում հաշվառում է կատարվել. նման հաշվառումներ կատարվում են 10 օրը մեկ անգամ:
«Պահեստի մատյանում մենք չհայտնաբերեցինք փաստահավաք խմբի անդամների խոսքերը հաստատող ոչ մի տվյալ: Նշված ժամանակահատվածում պահեստից դուրս են գրվել միայն մահճակալներ ու սրբիչներ: Մեր աշխատանքը թույլ է տալիս հաստատել, որ պաշտպանության նախարարության թիկունքի ծառայությունը ոչ մի կապ չունի մարտի 1-ի դեպքերի հետ»,- ասաց Արսենյանը:
Ժամանակավոր հանձնաժողովի անդամ, ՀՅԴ ներկայացուցիչ Արտյուշ Շահբազյանը նկատեց, որ եթե կեղծված լիներ գրանցամատյանը, պետք է փոխվեին կարգադրագրերը և հարյուրավոր սպաներ նորից ստորագրեին գրանցամատյանում, ինչը բացառվում է. յուրաքանչյուր իրային շարժքի դեպքում ստորագրում են երեք սպաներ, իսկ չորրորդը ստորագրում է հանդերձանքն ստացող զորամասի ներկայացուցիչը: --0--
