ԵՐԵՎԱՆ, 9 սեպտեմբերի. /Նովոստի-Արմենիա/. Հայաստանի պաշտպանության նախարարության ազգային ռազմավարական հետազոտությունների ինստիտուտը (ԱՌՀԻ) կվերափոխվի Պաշտպանության ազգային համալսարանի, տեղեկացրեց ԱՌՀԻ պետ, գեներալ-մայոր Հայկ Քոթանջյանը։
Այդ մասին ինստիտուտի պետն ասաց ամերիկացի փորձագետների՝ ԱՄՆ Ազգային պաշտպանական համալսարանի Մերձավոր Արևելք-Կենտրոնական Ասիա Ռազմավարական հետազոտությունների կենտրոնի ներկայացուցիչների, Հայաստանում ԱՄՆ նախկին դեսպան Մայքլ Լեմոնի, դոկտոր Ռոջեր Կանգասի, գնդապետ, պրոֆեսոր Էնն Մոյսանի և Հայաստանում ԱՄՆ դեսպանության ռազմական կցորդ, գնդապետ Ռոբերտ Վեբսթերի հետ հանդիպման ժամանակ։
«Ինստիտուտը՝ որպես տարածաշրջանի մտավոր քաղաքական-անվտանգային կենտրոններից մեկը, ակտիվ գործունեություն է ծավալել Պաշտպանական ազգային համալսարանի կերպափոխվելու ուղղությամբ»,- մեջբերեցին Քոթանջյանի խոսքերը Հայաստանի պաշտպանության նախարարության մամուլի ծառայությունից։
Քոթանջյանի խոսքերով՝ դա փուլային գործընթաց է։ «Ինստիտուտն արդեն անցել է զարգացման երկրորդ փուլ, որտեղ նախագծերի տեսքով ներկայացված են ապագա համալսարանի ենթակառուցվածքների կայացման հարցերը, այդ թվում՝ Ազգային անվտանգության դպրոցի ստեղծման ուղղությամբ»,- նշեց ինստիտուտի ղեկավարը։ Այս համատեքստում Քոթանջյանը կարևորեց ամերիկացի գործընկերների փորձը։
Նա նշեց նաև, որ որ վերջին տարիներին շարունակվում է սերտ համագործակցությունը ԱՄՆ-ի Պաշտպանական ազգային և Հարվարդի համալսարանների, ինչպես նաև, Մինսկի խմբի ձևաչափի շրջանակներում Լիոնի «Ժան Մուլին» համալսարանի Միջազգային անվտանգային և պաշտպանական հետազոտությունների կենտրոնի և ՌԴ Նախագահին առընթեր Պետական ծառայության ռուսաստանյան ակադեմիայի հետ։
Կողմերը հույս հայտնեցին, որ համագործակցության շնորհիվ հնարավոր կլինի նշված նախագծերի լիարժեք իրականացումը: Կողմերը նաև պատրաստակամություն հայտնեցին շարունակել աշխատանքային-փորձագիտական քննարկումները: -0-
