ԵՐԵՎԱՆ, 8 սեպտեմբերի. /Նովոստի-Արմենիա/. Հայկական «Արմավիա» ավիաընկերությունը ծրագրում է կոդ-շեր պայմանագրեր ստորագրել եվրոպական երեք ավիաընկերությունների հետ, երեքշաբթի «Նովոստի» միջազգային մամուլի կենտրոնում լրագրողներին ասաց «Արմավիա» ավիաընկերության կոմերցիոն տնօրենի պաշտոնակատար Թերեզա Ղազարյանը:
Նա նշեց, որ սեպտեմբերի 4-ին Փարիզում բանակցությունների արդյունքում կոդ-շեր է կնքվել հայկական «Արմավիա» ավիաընկերության ու Air France-ի միջև, ինչը հնարավորություն է տալիս ավելացնել Փարիզ կատարվող չվերթների հաճախականությունը, ինչի առնչությամբ ամենօրյա չվերթերի թիվը Երևանից Փարիզ կհասնի 5-ի, իսկ Փարիզից Երևան՝ 4-ի:
«Սա թույլ կտա մեր ուղևորներին ավելի հաճախ ուղևորվել Փարիզ՝ օգտագործելով ֆրանսիական մայրաքաղաքի տարանցիկ հնարավորությունները»,- ասաց Ղազարյանը:
Ավելին, նրա խոսքերով, այս համաձայնագրի ստորագրմամբ «Արմավիան» առաջին քայլն արեց խոշորագույն եվրոպական ավիաընկերությունների հետ համագործակցելու ուղղությամբ:
«Սա լուրջ քայլ է, որը մեր համագործակցությունը նոր մակարդակի է բարձրացնում»,- ասաց նա:
«Ժամկետներն ու ավիաընկերությունների անունները մենք առայժմ չենք հրապարակում՝ ելնելով կոմերցիոն գաղտնիքից, սակայն կարող եմ ասել, որ համապատասխան բանակցություններն արդեն տարվում են»,- ասաց Ղազարյանը:
Նրա խոսքերով՝ կոդ-շերի ստորագրումը թույլ է տալիս ընկերությանը պահպանել գնային քաղաքականությունը, մասնավորպես, չնայած այն բանին, որ Եվրոպայում գինը որոշվում է ազատ սկզբունքով, այնուամենայնիվ, ավիաընկերությունները որոշում են ընդունել համատեղ ու միասնական գնային քաղաքականություն անցկացնելու մասին, ինչը թույլ կտա ուղևորներին տոմս ձեռք բերել ցանկացած օր՝ երկու ուղղությամբ էլ պահպանելով զեղչերի հնարավորությունը ավիատոմսեր գնելիս:
Ընդ որում նա ընդգծեց, որ բոլոր չվերթերը կիրականացվեն ժամանակակից Airbus-320 ինքնաթիռներով՝ ավելացնելով, որ Երևան-Փարիզ չվերթի առաջին ուղևորներն արդեն օգտվել են նոր չվերթի ծառայություններից, որն իրականացվել է սեպտեմբերի 7-ին:
Նաև պայմանագրի համաձայն՝ փոփոխվել է ժամանման տերմինալը Փարիզի Շառլ Դը Գոլ օդանավակայանում, որը փոխարինվել է ավելի ժամանակակիցով:
Բանակցություններ են տարվում նաև ինքնաթիռների փոխադարձ տեխնիկական սպասարկման վերաբերյալ:
«Արմավիա» ավիաընկերությունը Օդային տրանսպորտի միջագզային ասոցիացիայի (IATA) անդամ է: Ընկերությունն իրականացնում է ամսական մոտ 250 չվերթ 30 ուղղություններով դեպի ԱՊՀ երկրներ, Եվրոպա և Միջին Արևելք:
2008թ.-ին ընկերությունը մոտ 647000 ուղևոր է փոխադրել: Ավիաընկերության օդանավերի պարկը բաղկացած է Ա-319, Ա-320, Իլ-86, Տու-134 ինքնաթիռներից: --0—
