Հայ-թուրքական հարաբերությունների բարելավման արձանագրությունների ստորագրմամբ սկիզբ կդրվի ազգի պառակտմանը, կարծում է ՀՅԴ բյուրոյի ներկայացուցիչ Հրանտ Մարգարյանը։
Օգոստոսի 31-ին Թուրքիայի և Հայաստանի արտգործանախարարությունները, ինչպես նաև Շվեյցարիայի արտաքին գործերի դեպարտամենտը հայտարարեցին, որ Հայաստանի հետ բանակցություններում, որոնք ընթանում են Շվեյցարիայի միջնորդությամբ, պայմանավորություն է ձեռք բերվել «քաղաքական խորհրդատվություններ» սկսել բանակցությունների ընթացքում շվեյցարական միջնորդությամբ նախնական ստորագրած երկու արձանագրությունների` «Երկու երկրների միջև դիվանագիտական հարաբերությունների հաստատման մասին արձանագրության» և «Երկկողմ հարաբերությունների զարգացման մասին արձանագրության» շուրջ: Քաղաքական խորհրդակցությունները ծրագրվում է ավարտել վեց շաբաթվա ընթացքում, որից հետո կստորագրվեն երկու արձանագրությունները, որոնք կներկայացվեն երկու երկրների խորհրդարանների հաստատմանը:
«Փաստաթղթի ստորագրումով մենք սկիզբ ենք դնում հայ ազգի պառակտմանը, ինչը մեծ վտանգ է, որը պետք է գիտակցաբար կանխել»,- երեքշաբթի մամուլի ասուլիսում հայտարարեց Մարգարյանը։
Նրա խոսքերով, արձանագրությունների ստորագրումը Հայաստանի համար առաջին և ամենագլխավոր վտանգն է։ Մարգարյանը կարծում է, որ փաստաթղթերի ստորագրման միջոցով «Հայաստանը կհրաժարվի սերունդներին պատկանող իրավունքից», իսկ Հայոց ցեղասպանության ճանաչման հարցը, որը Հայաստանի համար անվտանգության, իսկ հայ ազգի համար արժանապատվության և արդարության հարց է, խնդրահարույց կդառնա։
«Մեզ մտահոգում է հետևյալ խնդիրը՝ կա՞ն, արդյոք, մեխանիզմներ, որոնք թույլ կտան իրական արդյունքների հասնել հայ-թուրքական քննարկումներից, կարո՞ղ ենք մենք, արդյոք, ազդել քննարկումների արդյունքում ընդունված փաստաթղթերի վրա, հնարավոր կլինի՞, արդյոք, փոփոխություններ կատարել այդ փաստաթղթում»,- ասաց Մարգարյանը։
Արձանագրությունների կետերից, որոնցում կարելի է փոփոխություններ կատարել, նա նշեց Հայաստանի և Թուրքիայի կողմից պետությունների տարածքային ամբողջականության համատեղ ճանաչումը։ Միաժամանակ նա նշեց, որ ազգերի ինքնորոշման սկզբունքը փաստաթղթում ընդհանրապես բացակայում է։
Բացի այդ Մարգարյանը կարծում է, որ փաստաթղթերը հայերեն թարգմանելիս հայկական կողմն իրեն ի վնաս սխալ է թույլ տվել։
«Պետությունների տարածքային ամբողջականության համատեղ ճանաչումը Հայաստանի և Թուրքիայի կողմից նշանակում է, որ այդ երկրները ճանաչում են, ասենք, Ֆրանսիայի ամբողջականությունը»,- պարզաբանեց ՀՅԴ ներկայացուցիչը։
Մարգարյանը կոչ արեց նաև հայ ժողովրդին, որպեսզի անկախ քաղաքական համոզմունքներից՝ նա իր «ոչ»-ն ասի այդ արձանագրություններին և իր կամքով ստիպի իշխանություններին հաշվի նստել իր դիրքորոշման հետ։
Մարգարյանի խոսքերով՝ «Դաշնակցությունը» պատրաստ է համագործակցել նույն նպատակները հետապնդող ցանկացած ուժի հետ։ Միաժամանակ նա նշեց, որ պարտադիր չէ համագործակցության համար համատեղ փաստաթղթեր ստորագրել, բավական է կազմակերպել համատեղ ակցիաներ, որոնք ուղղված կլինեն պայմանագրի ստորագրման չթույլատրմանը։
Հայաստանի և Թուրքիայի միջև չկան դիվանագիտական հարաբերություններ, իսկ 1993-ից, պաշտոնական Անկարայի նախաձեռնությամբ, փակ է հայ-թուրքական սահմանը։
Առաջին քայլերը հարաբերություններում արվեցին 2008թ. սեպտեմբերի 6-ին, երբ Թուրքիայի նախագահ Աբդուլա Գյուլն առաջին անգամ ՀՀ նախագահ Սերժ Սարգսյանի հրավերով այցելեց Երևան՝ 2010 թ. աշխարհի առաջնության ընտրական փուլի շրջանակներում երկու երկրների հավաքականների միջև ֆուտբոլային հանդիպումը դիտելու համար։ Այցի ընթացքում երկու պետությունների ղեկավարները քննարկեցին երկկողմ հարաբերությունների հաստատման հնարավորությունները։
