ԵՐԵՎԱՆ, 4 սեպտեմբերի. /Նովոստի-Արմենիա/. Ղարաբաղյան հակամարտության կարգավորման գործընթացը պետք է փաթեթային լինի, ուրբաթ մամուլի ասուլիսի ժամանակ հայտարարեց ՀՀԿ փոխնախագահ Գալուստ Սահակյանը։
«Գոյություն ունի սկզբունքային վեց կետ, որոնցից մեզ համար բարենպաստ են միջանկյալ կարգավիճակը և կարգավիճակի վերջնական սահմանումը (Լեռնային Ղարաբաղի.- «Նովոստի-Արմենիա»)։ Մենք ասում ենք, եթե չկա որոշում այս փաստարկներից մեկի վերաբերյալ, ապա չեն ընդունվի նաև մյուսները։ Այսինքն, մենք գնում ենք կարգավորման ոչ փուլային, այլ փաթեթային գործընթացի ուղով»,- ասաց նա։
Սահակյանն ընդգծեց, որ ԼՂՀ-ն պետք ունենա բոլոր ինստիտուտները, որոնք հատուկ են պետությանը, այդ թվում՝ ունենա բանակ, նախագահ, կառավարություն, և լինի միջազգային հարաբերությունների սուբյեկտ։
Ղարաբաղյան հակամարտությունը սկսվել է 1988 թվականին, երբ գերազանցապես հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին: 1991թ. դեկտեմբերի 10-ին Լեռնային Ղարաբաղում հանրաքվե անցկացվեց, որի ժամանակ մասնակիցների 99,89 տոկոսը քվեարկեց Ադրբեջանից լիովին անկախանալու օգտին:
Դրան հետևեցին Ադրբեջանի ձեռնարկած լայնածավալ ռազմական գործողությունները, որոնք հանգեցրեցին նրան, որ վերացավ հսկողությունը ոչ միայն Լեռնային Ղարաբաղում, այլև հարակից յոթ շրջանում:
1994թ. մայիսի 12-ին զինադադարի վերաբերյալ կնքված եռակողմ համաձայնագրից հետո հակամարտության գոտում դադարեցին ռազմական գործողությունները, որոնց արդյունքում երկու կողմից էլ մահացավ շուրջ 25-30 հազար մարդ, և մոտ մեկ միլիոնն ստիպված լքեց բնօրրանը:
Հրադադարի ռեժիմ հաստատելու վերաբերյալ համաձայնագիրը մինչ այսօր ուժի մեջ է: 1992 թվայանից ի վեր հակամարտության խաղաղ կարգավորման ուղղությամբ բանակցություներ են տարվում ԵԱՀԿ Մինսկի խմբի շրջանակներում, որոնց համանախագահներն են ԱՄՆ-ն, Ռուսաստանը և Ֆրանսիան:-0-
