ԵՐԵՎԱՆ, 3 սեպտեմբերի. /Նովոստի-Արմենիա/. ՀՀ արտաքին քաղաքականության գերատեսչության ներկայացուցիչները՝ ՀՀ ԱԳ նախարար Էդվարդ Նալբանդյանի գլխավորությամբ, այցելել են Synopsys Armenia ընկերություն, որտեղ ծանոթացել են ընկերության գործունեության և հանրապետության ՏՏ-ոլորտի զարգացման հեռանկարներին:
Հանդիպման ընթացքում Synopsys Armenia ընկերության գործադիր տնօրեն Հովիկ Մուսայելյանը հյուրերին ներկայացրել է ընկերության գործունեությունն ու 5 տարվա ձեռքբերումները:
«Մուսայելյանը ներկայացրել է Synopsys-ի ֆինանսական գործունեության դրական արդյունքները և նշել, որ ընկերությունը ներկա տնտեսական ճգնաժամի պայմաններում ունի ֆինանսական ցուցանիշների և աշխատողների քանակի զգալի աճ», - ասվում է տեղեկատվության մեջ:
Առանձնահատուկ ուշադրություն է հրավիրվել աշխարհում Հայաստանի Հանրապետության ճանաչելիության և հեղինակության բարձրացմանն ուղղված միջոցառումներին և նոր նախաձեռնություններին:
Այդ հարցերի թվում կողմերն անդրադարձել են «Սինոփսիսի շաբաթը Հայաստանում» միջոցառման շրջանակներում իրականացվող մի շարք միջոցառումներին:
Մասնավորապես խոսքը ՏՏ ոլորտի լավագույն ուսանողներին շնորհվող ՀՀ Նախագահի Ամենամյա Կրթական պարգևի մրցանակաբաշխության մասին էր, որն այս տարի կանցկացվի 5-րդ անգամ:
Բացի այդ, կանցկացվի Հայաստանյան միկրոէլեկտրոնիկայի 4-րդ ամենամյա օլիմպիադան, որն այս տարի արդեն դառնում է միջազգային՝ մասնակիցներ ունենալով Ռուսաստանից և Ուկրաինայից:
Այս տարի նոյեմբերի 5-8-ը ԱՄՆ-ում՝ Սիլիկոնային հովտում կանցկացվի ԱրմԹեք 09 համաժողովը: Սա երրորդ ամենամյա ԱրմԹեք Կոնգրեսն է, որն անցկացվում է «Սովորել անցյալից, բացահայտել ապագան» խորագրի ներքո:
ԱրմԹեք Կոնգրես 09-ը տեղի կունենա ՀՀ վարչապետի բարձր հովանու ներքո: ՀՀ կառավարությունը շեշտադրում է ԱրմԹեք համաժողովի` որպես Հայաստանի ներկա ձեռքբերումների պահպանմանն ուղղված քաղաքականության և նախաձեռնությունների քննարկման, պլանավորման և իրականացման հարթակի տրամադրման միջոցի, ինչպես նաև համաշխարհային մակարդակով Հայաստանի` որպես աշխարհում առավել արագ զարգացող բարձր տեխնոլոգիաների ոլորտ ունեցող երկրներից մեկի մասին իրազեկության բարձրացման նշանակությունը:
Մուսայելյանը ներկաների ուշադրությունը հրավիրել է ընկերության նոր նախաձեռնության վրա՝ որն է Հայաստանի Հանրապետության նախագահի՝ ՏՏ ոլորտում Համաշխարհային Հեղինակության ամենամյա պարգևի հիմնադրումը: Հույիսի 6-ին ՀՀ նախագահի հրամանագրի համաձայն, այս տարի առաջին անգամ կանցկացվի այս համաշխարհային մասշտաբի մրցանակաբաշխությունը:
Մրցանակը դիտվում է որպես փայլուն փոխկապակցող միջոց ապագայի պոտենցիալ ներդրումների համար, որը կբարձրացնի երկրի հեղինակությունը՝ որպես տարածաշրջանային բարձր տեխնոլոգիաների կենտրոնի, և կօգնի ընդգծել Հայաստանի տեղն ու դերակատարումը համաշխարհային ՏՏ քարտեզի վրա: Այն նաև կավելացնի օտարերկրյա ներդրողների վստահությունը Հայաստանի նկատմամբ:
Մրցանակը բաղկացած է մեծ ոսկե մեդալից, դիպլոմից և հուշախորհրդանիշից: -0-
