Հայաստանը ձեռնարկելու է Ռուսաստանի հետ երկկողմ հարաբերությունների խորացմանն ու ամրապնդմանն ուղղված բոլոր հնարավոր քայլերը. ՀՀ նախագահ
ԵՐԵՎԱՆ, 1 սեպտեմբերի. /Նովոստի-Արմենիա/. Հայաստանը ձեռնարկելու է Ռուսաստանի հետ երկկողմ հարաբերությունների խորացմանն ու ամրապնդմանն ուղղված բոլոր հնարավոր քայլերը, երեքշաբթի հայտարարեց Հայաստանի նախագահ Սերժ Սարգսյանը ԱԳՆ կենտրոնական աշխատակազմի և արտերկրում Հայաստանի դիվանագիտական առաքելությունների և ներկայացուցչությունների ղեկավարների ամենամյա հավաքի ընթացքում։
Ինչպես երեքշաբթի «Նովոստի-Արմենիա» գործակալությանը հայտնեցին նախագահի մամուլի ծառայությունից, երկրի նախագահը հատուկ անդրադարձավ «մեր ռազմավարական դաշնակցի` բարեկամ Ռուսաստանի հետ բազմաբովանդակ և լայնածավալ համագործակցությանը»։
«Մենք ձեռնարկել և ձեռնարկելու ենք հնարավոր բոլոր քայլերը բոլոր ոլորտներում համագործակցության խորացման և ամրապնդման ուղղությամբ: Նախագահների մակարդակով արդեն ունեցել ենք բազմաթիվ հանդիպումնր, այդ թվում` փոխադարձ պաշտոնական այցեր»,- ասաց Սարգսյանը։
Նախագահը նշեց, որ այցելությունների շարք է սկսել Ռուսաստանի Դաշնության մարզեր, հատկապես` հայաշատ շրջաններ:
«Վստահ եմ, որ Ռուսաստանի Դաշնության սուբյեկտների հետ աշխատանքը մեծ ներուժ ունի ինչպես հայ-ռուսական տնտեսական կապերը խթանելու, այնպես էլ մեր հայրենակիցներին ոգևորելու ու Հայաստանի հետ նրանց կապն ամրապնդելու առումով»,- ասաց Սարգսյանը։
Միաժամանակ նա հիշեցրեց, որ տնտեսական ճգնաժամի առաջին իսկ դրսևորումների շրջանում մենք Ռուսաստանի Դաշնությունից ստացանք 500 մլն ԱՄՆ դոլար վարկ, որն ուղղվեց ճգնաժամի ազդեցությունները մեղմելու խնդրի լուծմանը: -0-
