Թուրքիան ղարաբաղյան խնդրի կարգավորման հարցում առաջընթացի հույս ունի. ԱԳՆ ղեկավար

Թուրքիան առաջիկայում «զգալի առաջընթացի» հույս ունի ղարաբաղյան հակամարտության կարգավորման հարցում, երեքշաբթի հայտարարել է երկրի ԱԳՆ ղեկավար Ահմեդ Դավութօղլուն, հաղորդում է ՌԻԱ Նովոստին:

«Մենք ցանկանում ենք, որ հակամարտությունը շուտափույթ լուծում ստանա և կարծում եմ, որ դրա լուծումն ապահովելը հնարավոր կդառնա, եթե Ղարաբաղի խնդրի լուծմանը ներգրավված բոլոր կողմերը բարի կամք դրսևորեն»,- NTV հեռուստատեսության ուղիղ եթերում ասել է թուրք նախարարը՝ մեկնաբանելով Հայաստանի և Թուրքիայի արտգործնախարարությունների և Շվեյցարիայի արտաքին գործերի դեպարտամենտի միջև դիվանագիտական հարաբերությունների մասին խորհրդատվություններ սկսելու վերաբերյալ ստորագրված արձանագրությունը:

Երկուշաբթի երեկոյան Թուրքիայի և Հայաստանի արտգործնախարությունները, ինչպես նաև Շվեյցարիայի Արտաքին գործերի դեպարտամենտը հայտարարեցին, որ Հայաստանի հետ բանակցություններում, որոնք տարվում են Շվեյցարիայի միջնորդությամբ, պայմանավորվածություն է ձեռք բերվել «Դիվանագիտական հարաբերություններ հաստատելու մասին արձանագրության» և «Երկկողմ հարաբերությունների զարգացման մասին արձանագրության» ստորագրմանը վերաբերող «ներքաղաքական խորհրդատվությունների» սկզբի մասին:  Քաղաքական խորհրդատվությունները ծրագրվում է ավարտել վեց շաբաթվա ընթացքում, որից հետո կստորագրվի երկու արձանագրություն, որոնք կհանձնվեն երկու երկրի խորհրդարանների հաստատմանը:  

«Մեզ չի բավարարում Կովկասի ներկա ստատուս-քվոն: Դա Թուրքիայի, Ադրբեջանի և Հայաստանի շահերից չի բխում»,- ասել է Թուրքիայի ԱԳՆ ղեկավարը: -Թուրքիան արել է իրենից կախված հնարավոր ամեն բան (ղարաբաղյան հակամարտության կարգավորման համար): Այժմ իրենց առաքելությունը պետք է կատարեն մյուս երկրները:

Թուրքիայի ԱԳՆ ղեկավարը հայտնել է նաև, որ քաղաքական խորհրդատվությունները կտևեն վեց շաբաթ, որից հետո կստորագրվի երկու արձանագրություն, որոնք կհանձնվեն երկու երկրի խորհրդարանների հաստատմանը: Վավերացումից երկու շաբաթ անց այդ փաստաթղթերն ուժի մեջ կմտնեն, ավելացրել է Դավիթօղլուն:

Արձանագրությունների ուժի մեջ մտնելու առնչությամբ նա կանխատեսումներ չարեց, սակայն ավելացրեց, որ Թուրքիան Հայաստանի հետ հարաբերությունները շուտափույթ կերպով բարելավելու կողմնակից է:

Արտգործնախարարի խոսքով, ինքը մտադրությւոն ունի Հայաստանի հետ հարաբերությունների բարելավման հարցերի շուրջ պայմանավորվածությունների մասին տեղեկացնել իր ռուս և ֆրանսիացի գործընկերներին: Ավելի վաղ նա հեռախոսազրույց էր ունեցել ԱՄՆ պետքարտուղարի հետ:-0-