ԵՐԵՎԱՆ, 10 օգոստոսի. /Նովոստի-Արմենիա/. Հայաստանում փախստականների խնդիրները, այդ թվում կրթության իրավունքի պահպանումը, գտնվում են Կրթության և գիտության նախարարության մշտական ուշադրության կենտրոնում, երկուշաբթի ասաց ՀՀ կրթության և գիտության նախարար Արմեն Աշոտյանը Հայաստանում ՄԱԿ-ի փախստականների գրասենյակի /UNHCR/ ներկայացուցիչ Բուշրա Հալեպոտայի հետ հանդիպման ժամանակ:
Ինչպես «Նովոստի-Արմենիա» գործակալությանը հայտնեցին նախարարության մամուլի ծառայությունից, հանդիպման ընթացքում քննարկվել են գրասենյակի կատարած աշխատանքները և փախստականների կրթական խնդիրներին առնչվող հարցեր:
Նախարարը նշեց, որ UNHCR տարիներ շարունակ նպաստել է նրանց` հասարակության ինտեգրմանը, չնայած այսօր էլ դրան խոչընդոտող մի շարք խնդիրներ կան` սոցիալական, տնտեսական, ինչպես նաև լեզվական և կրթական:
Իր հերթին Բուշրա Հալեպոտան տեղեկացրեց, որ Հայաստանի տասներկու բուհում արդեն ընթանում են փախստականների իրավունքների վերաբերյալ դասընթացներ, և նա ապավինում է նախարարության աջակցությանը` մյուս բուհերում ևս այդ դասընթացները ներդնելու համար:
Գրասենյակի ներկայացուցիչն անդրադարձավ փախստականների հարցերի շուրջ դասագրքերի ստեղծման անհրաժեշտությանը: Նա տեղեկացրեց նաև, որ ՄԱԿ-ի փախստականների գրասենյակը աջակցություն է ցուցաբերել դպրոցաշինական ծրագրերին, մասնավորապես, վերանորոգվել են մի շարք ուսումնական հաստատություններ:
Բուշրա Հալեպոտան խոսեց նաև հետագայում ուսումնական հաստատությունները համապատասխան մարզական պարագաներով հագեցնելու և տարբեր միջոցառումներ անցկացնելու անհրաժետության մասին: Նա նաև կոչ արեց ընդլայնել տարբեր ծրագրերում փախստականների ընդգրկվածութան աստիճանը:
Անդրադառնալով հյուրի բարձացրած խնդիրներին` նախարարը նշեց, որ կրթության և գիտության նախարարությունը հնարավորությունների սահմաններում կփորձի աջակցել միջին մասնագիտական ուսումնական հաստատությունների վճարովի համակարգ ընդունված փախստականներին` նրանց անվճար համակարգ տեղափոխելու հարցում` նկատի ունենալով նրանց սոցիալական վիճակը:
Անդրադառնալով դասագրքերի խնդրին` նախարարը ողջունեց գաղափարը:
Հանդիպման ընթացքում անդրադարձ եղավ նաև երկկողմանի փոխըմբռնման հուշագրի ստորագրման անհրաժեշտությանը:-0-
