Պրոֆեսիոնալ խորհրդարանը Հայաստանում որակյալ օրենսդրական բազա ստեղծելու լավագույն նախապայմաններից է. իրավաբան

ԵՐԵՎԱՆ, 7 օգոստոսի. /Նովոստի-Արմենիա/. Պրոֆեսիոնալ խորհրդարանը  Հայաստանում որակյալ օրենսդրական բազա ստեղծելու լավագույն նախապայմաններից է, կարծում է իրավաբանական գիտությունների թեկնածու Հրայր Թովմասյանը։

«Իհարկե, չի կարելի գուշակել, թե ով լավ պատգամավոր կլինի, բայց դա չի արդարացնում Հայաստանի քաղաքացիների անտարբեր վերաբերմունքը պետության օրենսդրական մարմնի ձևավորման նկատմամբ»,- ուրբաթ մամուլի ասուլիսում հայտնեց Թովմասյանը։

Նրա խոսքերով՝ հայերն ավելի բծախնդիր են ավտոմեքենա կամ կենցաղային պարագաների ընտրության, քան օրենսդիր իշխանության մարմնում ներկայացուցիչ ընտրելու հարցում։
 
Խոսելով արդար և ժողովրդավարական պետության նշանակության մասին, որի սկզբունքներն ամրագրված են Հայաստանի Հիմնական օրենքում, Թովմասյանը նշեց, որ «մինչև որ հայկական հասարակությունը չգիտակցի այն, ինչին տիրապետում է, օրենքում ամրագրված սկզբունքների նյութականացում սպասել պետք չէ»։

Զուգահեռ տանելով պետության՝ որպես ամբողջական համակարգի և մարդու օրգանիզմի միջև՝ Թովմասյանը նշեց, որ ինչպես և կենսաբանական օրգանիզմում, պետությունում ևս բոլոր բաղկացուցիչները սերտ կապի մեջ են։ Սակայն, ըստ նրա, դա դեռևս բացարձակ և սարքին համակարգի առկայության երաշխիք չէ։

«Չնայած, որ ազատական, ժողովրդավարական պետության բոլոր սկզբունքներն ամրագրված են Հայաստանի Սահմանադրությունում՝ «պատային իրավիճակը» մեր պետությունում չի փոխվում անկախություն ձեռք բերելուց հետո»,- ասաց նա։

Թովմասյանի խոսքերով՝ Հայաստանում ընտրությունները վաղուց դադարել են իրենց նպատակին ծառայելուց և միայն նոր խնդիրներ են առաջացնում հասարակությունում և քաղաքական շրջանակներում, հասարակական ընտրություն և իշխանությունների լեգիտիմացում չի կատարվում։ -0-