ԵՐԵՎԱՆ, 27 հուլիսի. /Նովոստի-Արմենիա/. Հայաստանի ոստիկանությունը Վրաստանի քաղաքացիներին, ովքեր մեղադրվում են ՎՏԲ Հայաստան Բանկի մասնաճյուղերից մեկի վրա ավազակային հարձակում կատարելու մեջ, կասկածում է մայրաքաղաքում ևս երկու հանցագործություն կատարելու մեջ, ասվում է Հայաստանի Ոստիկանության օպերատիվ ամփոփագրում։
«Հուլիսի 5-ին առավոտյան Երևանի բնակչուհի 40-ամյա Նազիկ Բ.-ն ոստիկանության Կենտրոնականի բաժնում հաղորդում է տվել, որ նույն օրը, ժամը 05.40-ին իր բջջային հեռախոսահամարին բնակարանի անվտանգության համակարգից զանգ է ստացվել, և երբ վերադարձել է տուն, նկատել է, որ մուտքի դռան փականը կոտրված է, դուռը կիսաբաց վիճակում է, սակայն բնակարանը ստուգելուց հետո պարզել է, որ ոչինչ չեն գողացել»,- ասվում է ամփոփագրում։
Հուլիսի 21-ի առավոտյան թալանվել է Երևանի բնակչուհի Վիկտորիա Լ.-ի բնակարանը։
«Հետագայում, հուլիսի 26-ին ոստիկանության Արաբկիրի բաժնի ծառայողների իրականացրած օպերատիվ քննչական միջոցառումների շնորհիվ պարզվել է, որ նշված գողությունը կատարել են հուլիսի 22-ին Բաղրամյան պողոտայում գտնվող «ՎՏԲ-Հայաստան» բանկի մասնաճյուղի վրա ավազակային հարձակում կատարելու համար հաջորդ օրը հայտնաբերված և ձերբակալված Դավիթ Աբուլաձեն, Ռևազ Գուլբատաշվիլին, Թինատին Դավիթաշվիլին և Գելա Աբուլաձեն: Գողոնը մասամբ առգրավված է»,- ասվում է հաղորդագրությունում։
ՎՏԲ Հայաստան Բանկի Բաղրամյան պողոտայում գտնվող մասնաճյուղը թալանվել էր հուլիսի 22-ին: Այն ժամանակ դիմակավորված և զինված երեք անհայտ անձինք մուտք են գործել նշված մասնաճյուղ, դանակի սպառնալիքով ծեծի ենթարկել կառավարիչ, 55-ամյա Սեդա Հ.-ին և հափշտակելով 3 միլիոն 900.000 դրամ, 3 040 դոլար, 420 եվրո, 18 000 ռուբլի` դիմել են փախուստի:
Արդեն հաջորդ օրը Հայաստանի Ոստիկանությունը ավազակային հարձակում կատարելու կասկածանքով ձերբակալեց Վրաստանի չորս քաղաքացիների՝ 38-ամյա Ռևազ Գուլբաթաշվիլիին, 37-ամյա Թինատին Դավիթաշվիլիին, 33-ամյա զարմիկներ Դավիթ և Գելա Աբուլաձեներին։
Անձնական քննության ժամանակ նրանց մոտ հայտնաբերվեց և առգրավվեց ընդհանուր առմամբ 3,8 հազար ԱՄՆ դոլար և 6 հազար ռուսական ռուբլի, սպորտային հագուստ, կնոջ կեղծամ, գլխարկներ, պայուսակներ, սև ակնոցներ, փակվող դանակ, ոգելից խմիչքներ և այլ առարկաներ։ Հետագայում ձերբակալվածները ընդունեցին ՎՏԲ Հայաստան բանկի մասնաճյուղի վրա ավազակային հարձակում կատարելու իրենց մեղքը։
«ՎՏԲ Հայաստան Բանկ» ՓԲԸ-ն (մինչև 2006 թ.-ի հունիսի 20-ը՝ «Հայխնայբանկ» ՓԲԸ) դարձել է ՎՏԲ խմբի մասնակից 2004 թ.-ի ապրիլին: ՎՏԲ բանկը «ՎՏԲ Հայաստան Բանկ» ՓԲԸ-ի 100 տոկոս բաժնետոմսերի սեփականատերն է:
Այժմ բանկն ունի 78 մասնաճյուղ:-0-
